ԵՐԵՎԱՆ, 12 նոյեմբերի – Sputnik. Աշխարհահռչակ սոպրանո, Ռուսաստանի և Աբխազիայի ժողովրդական երգչուհի Հիբլա Գերզմավան հաճույքով է ընդունել «Երևանյան հեռանկարներ» փառատոնի շրջանակում Հայաստանում համերգով հանդես գալու առաջարկը։
«Հայերին շատ եմ սիրում. նրանց մեջ այնքա՜ն ջերմություն կա, այնքա՜ն ներքին գեղեցկություն։ Ես մեծացել եմ Աբխազիայում, հայ ընկերներ շատ ունեմ, դրա համար էլ հայերն ինձ համար շատ ջերմ ու հարազատ մարդիկ են»,–ասաց նա` պատասխանելով Sputnik Արմենիայի թղթակցի հարցին, թե ինչ զգացողություններ է արթնացնում Հայաստանը։
Նա նշեց, որ շատ գեղեցիկ համերգ է սպասվում։ Երգչուհին հույս հայտնեց, որ հայ հանդիսատեսին դուր կգա. «Ես գիտեմ, որ դուք նրբաճաշակ հանդիսատես ունեք, որը գիտի, թե ինչի համար է գալիս համերգին. սա շատ հաճելի փաստ է: Ես շատ ընկերներ ունեմ Հայաստանից՝ օպերային երգիչներ և դասական երաժիշտներ։ Ուրախ եմ նրանց հետ ընկերանալու և աշխատելու համար»:
Հիբլա Գերզմավա
© Photo : press office of Armenian National Philharmonic
Անդրադառնալով արդեն 20-ամյա «Հիբլա Գերզմավան հրավիրում է» փառատոնին՝ երգչուհին նշեց, որ այն դասական երաժշտական փառատոն է, որտեղ ջազի նոտա էլ կա:
«Մանկությունից սեր ունեմ ջազի հանդեպ։ Իմանալով, որ այստեղ շատ հետաքրքիր ջազային պատմություն կա, հուսով եմ, որ նաև այս ծրագրով կգամ Հայաստան»,–ասաց երգչուհին։
Հարցին, թե արդյոք անակնկալներ կլինեն հանդիսատեսի համար, նա պատասխանեց. «Ցավդ տանեմ, հայ հանդիսատեսի համար միշտ էլ անակնկալ է նախատեսված»։
Աշխարհահռչակ սոպրանոն նաև հիշեցրեց Հայաստանում դեկտեմբերի 10-ին նախատեսված ելույթի մասին, որտեղ նա հանդես կգա Մոսկվայի Ստանիսլավսկու և Նեմիրովիչ-Դանչենկոյի անվան երաժշտական ակադեմիական թատրոնի մենակատար Արսեն Սողոմոնյանի, բելառուսցի օպերային երգիչ Վլադիսլավ Սուլիմսկու հետ։ Համերգը կղեկավարի դիրիժոր Էդուարդ Թոփչյանը։
Նշենք, որ Գերզմավան համաշխարհային ճանաչում է ձեռք բերել Մարիինյան թատրոնում, Լոնդոնի Թագավորական «Քովենթ Գարդենի» օպերայում, Մետրոպոլիտենում, Վիեննայի պետական, ֆրանսիական օպերաներում կատարած ելույթների շնորհիվ։
Հիբլան համարվում է ռուսական օպերայի ամենաէլեգանտ կանանցից մեկը բեմում։ Հաճախ երգչուհին ինքն է ընտրում ելույթների համար նախատեսված հագուստը` համարելով, որ արտիստը պետք է հանդես գա ամենաթանկարժեք և նուրբ զգեստով: