Տղա՞, թե՞ աղջիկ․ Սարիկ Անդրեասյանն ու Լիզա Մորյակը բացահայտել են երեխայի սեռը. տեսանյութ

ԵՐԵՎԱՆ, 10 նոյեմբերի – Sputnik. Ռուսաստանաբնակ հայտնի ռեժիսոր և պրոդյուսեր Սարիկ Անդրեասյանը և դերասանուհի Լիզա Մորյակը բացահայտել են իրենց ապագա երեխայի սեռը։ Համապատասխան տեսանյութը Սարիկը հրապարակել է «Ինստագրամի» իր էջում։

Նշենք, որ հոկտեմբերի սկզբին հայտնի դարձավ, որ զույգը շուտով երեխա կունենա։ Իսկ այժմ նրանք որոշել են երկրպագուներին հայտնել երեխայի սեռը։

Տեսանյութում Սարիկն ու Լիզան տանն են ու բացում են մի մեծ տուփ, որի վրա գրված է «Տղա՞, թե՞ աղջիկ»։ Տուփից դուրս են թռչում վարդագույն փուչիկներ։

«Եվ նա աղջիկ է», - կատակել է Սարիկը։

Հիշեցնենք, որ Սարիկը մեկ անգամ արդեն ամուսնացած է եղել լրագրող Ալյոնա Անդրեասյանի հետ։ Առաջին ամուսնությունից նա ունի երկու որդի` Մարկը (2013թ.) և Մարտինը (2017թ.): Սակայն 2018 թվականին, յոթ տարվա ամուսնությունից հետո, պրոդյուսերը բաժանվեց կնոջից, բայց շարունակում է հոգ տանել երեխաների մասին։

Շատերը բաժանման պատճառը համարեցին երիտասարդ դերասանուհի Լիզա Մորյակին, որի հետ ռեժիսորը բուռն սիրավեպ ուներ: Հարցազրույցներից մեկում դերասանուհին խոստովանել է, որ իրենք ծանոթացել են «Աղջիկները տարբեր են լինում» ֆիլմի նկարահանման հրապարակում։