ԵՐԵՎԱՆ, 10 նոյեմբերի – Sputnik․ «Վերին Լարս» սահմանային անցակետի թողունակությունը մեկ օրվա համար 180 տրանսպորտային միավորից հասցվել է 950-ի, սակայն դեռևս լուծում պահանջող հարցեր կան:
Sputnik Արմենիա մուլտիմեդիոն մամուլի կենտրոնում կայացած մամուլի ասուլիսի ժամանակ հայտարարեց Ռուսաստանի Պետդումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կազբեկ Տայսաևը։
«Մենք արդեն փորձ ունենք լուծելու այն հարցերը, որոնք ծագել են այդ սահմանային անցակետում։ Ժամանակին «Վերին Լարսի» թողունակությունը 180 մեքենա էր, բայց երբ Հայաստանի խորհրդարանի մեր գործընկերները հանդես եկան այդ հարցը մշակելու նախաձեռնությամբ, որպեսզի ավելացնեն անցակետի հնարավորությունը, մենք իրականացրեցինք անհրաժեշտ աշխատանքը»,- ասաց Տայսաևը։
Արդյունքում, անցակետի թողունակությունն ավելացվել է հինգ անգամ: Նա նշեց, որ դա իրավիճակի լուծում չէ, այսօր նոր խնդիրներ ու հարցեր կան։
«Մենք կողմնորոշվել ենք առկա խնդիրների շուրջ, պայմանավորվել ենք համատեղ նիստ անցկացնել արդեն դեկտեմբերին Մոսկվայում», - հայտնեց Տայսաևը։
Նա ընդգծեց տրանսպորտային այլ հաղորդակցությունների հնարավորության քննարկման անհրաժեշտությունը, որ զարգացող տնտեսական նախագծերը հետագայում ևս զարգանան։