ԵՐԵՎԱՆ, 10 նոյեմբերի – Sputnik. Պաշտոնական վիճակագրության համաձայն` 2022թ.-ի առաջին 6 ամիսների ընթացքում Հայաստանի Հանրապետությունում ապաստանի հայց է ներկայացրել 320 մարդ, որոնցից 213-ն Ուկրաինայի քաղաքացիներ են։
ՀՀ-ում ապաստան հայցող անձանց թիվը տարեկան միջինում կազմում է շուրջ 270 անձ։ Այդ թիվն առանձին տարիներին աճում է` պայմանավորված հակամարտություններով։ Սիրիական ճգնաժամի հետևանքով 2012թ.-ին ՀՀ-ում ապաստան հայցող անձանց թիվը հասել էր 579-ի, իսկ 2013-ին՝ 320-ի։
Ապաստան տրամադրելու` ՀՀ իշխանությունների հնարավորությունները, սակայն, սահմանափակ են` պայմանավորված կացության խնդրի լուծման պահանջով։ Այդ խնդիրը մասամբ լուծվում է Հայաստանի Հանրապետության տարածքային կառավարման և ենթակառուցվածքների նախարարության միգրացիոն ծառայության «Հանրակացարաններ» պետական ոչ առևտրային կազմակերպության սպասարկման ենթակա սոցիալական տներում ժամանակավոր կացարան տրամադրելու միջոցով, որտեղ հնարավոր է բնակեցնել մինչև 50 անձանց, մնացած` տարեկան միջինը շուրջ 100 անձանց, պետությունը բնակարանի վարձակալության գումարով է փոխատուցում։
Առկա մարտահրավերներին դիմագրավելու ու ապաստան հայցողներին բնակության պայմաններով ապահովելու նպատակով կառավարությունն այսօր նոր որոշում է կայացրել, որով հստակեցրել է փախստական ճանաչված անձանց բնակարանային ապահովության ծրագրի հիմնական դրույթները։
Նոր որոշման համաձայն` բնակվարձի փոխհատուցում տրամադրվելու է ՀՀ–ում փախստական ճանաչված անձանց մինչև 6 ամիս ժամկետով` 6 ամսվա ընթացքում լեզուն սովորելու, իրենց զբաղվածության ու բնակության պայմանների հարցն ինքնություւյն լուծելու նպատակով։
Փոխհատուցում չեն ստանա փախստականի կարգավիճակ ստացած այն անձինք, որոնք վերջին 10 տարում ՀՀ-ում բնակելի տարածություն չեն օտարել։
Դիմումը կմերժվի նաև այն դեպքում, եթե դիմողը հրաժարվել է սոցիալական տներում տեղավորվել, դիմել է ընտանիքից առանձին, ՀՀ կամ միջազգային կազմակերպություններից արդեն բնակարան վարձակալելու նպատակով փոխհատուցում է ստացել, տեղավորվել է կացարանում կամ ձեռք է բերել բնակելի տարածություն:
Փոխհատուցումը ընտանիքի յուրաքանչյուր անդամի համար կկազմի ամսական 60 000 ՀՀ դրամ։