ԵՐԵՎԱՆ, 7 նոյեմբերի – Sputnik. ՀՀ վարչապետ Նիկոլ Փաշինյանը և ԱԺ «Քաղաքացիական պայմանագիր» խմբակցության պատգամավորները հանդիպել են, քննարկել հիմնականում արտաքին քաղաքական հարցեր։ Sputnik Արմենիայի հետ զրույցում տեղեկությունը հայտնեց ՔՊ–ական պատգամավոր Սարգիս Խանդանյանը։
Նշենք, որ ԱԺ-ում կազմակերպված հանդիպումն արդեն ավարտվել է։
Խանդանյանն ասաց, որ մեկ ամսից ավել էր` նման հանդիպում չէր եղել։
«Վարչապետի հետ հանդիպման ժամանակ քննարկվել են վերջին շրջանի զարգացումները` հիմնականում արտաքին քաղաքակությանն առնչվող։ Անդրադարձ է կատարվել հոկտեմբերից այս կողմ կայացած հանդիպումներին` ինչպես Պրահայում կայացած քառակողմ, այնպես էլ Սոչիում կայացած եռակողմ հանդիպմանը»,–ասաց պատգամավորը։
Հիշեցնենք` ՀՀ վարչապետը հոկտեմբերի 6-ին Պրահայում մասնակցել է Եվրոպական քաղաքական համայնքի գագաթնաժողովին, քառակողմ հանդիպում ունեցել Ֆրանսիայի նախագահ Էմանուել Մակրոնի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի մասնակցությամբ, մասնակցել է Էրդողան–Ալիև ոչ ֆորմալ հանդիպմանը, առանձնազրույց ունեցել Թուրքիայի նախագահ Էրդողանի հետ։ Քառակողմ հանդիպման ժամանակ Հայաստանն ու Ադրբեջանը հաստատել են իրենց հանձնառությունը ՄԱԿ-ի կանոնադրությանը և 1991թ. Ալմա Աթայի հռչակագրին, որոնց միջոցով երկու կողմերն էլ ճանաչում են միմյանց տարածքային ամբողջականությունն ու ինքնիշխանությունը:
Հոկտեմբերի 31-ին էլ Սոչիում է հանդիպում կայացել։ Հայաստանի վարչապետ Նիկոլ Փաշինյանը, Ռուսաստանի նախագահ Վլադիմիր Պուտինը և Ադրբեջանի նախագահ Իլհամ Ալիևը հանդիպել են և քննարկել 2020 թվականի նոյեմբերի 9-ի, 2021 թվականի հունվարի 11-ի և նոյեմբերի 26-ի եռակողմ հայտարարությունների իրականացման ընթացքը։
Հանդիպման արդյունքում համատեղ հայտարարություն է ընդունվել, որում նրանք վերահաստատել են նշյալ բոլոր պայմանավորվածությունները խստորեն պահպանելու հանձնառությունը՝ ելնելով հայ-ադրբեջանական հարաբերությունների համապարփակ կարգավորման, Հարավային Կովկասում խաղաղության, կայունության, անվտանգության և կայուն տնտեսական զարգացման ապահովման շահերից։