ԵՐԵՎԱՆ, 7 նոյեմբերի - Sputnik. Իրանի ոստիկանությունը Թեհրանի Իմամ Խոմեյնիի անվան միջազգային օդանավակայանում առգրավել է 27 կգ հերոին, որը թաքցված է եղել արդյունաբերական գլանների խմբաքանակում: Այս մասին հայտնել է իրավակարգի ուժերի հանցագործությունների կանխման բաժնի օդանավակայանների ոստիկանության ղեկավար Մոհսեն Ագիլին։
«Իմամ Խոմեյնիի անվան միջազգային օդանավակայանի թմրամիջոցների դեմ պայքարի ոստիկանության բաժնի աշխատակիցների մոտ արտասահման ուղարկվող բեռների ստուգման ժամանակ կասկածներ են առաջացել, որ արդյունաբերական գլանների խմբաքանակում կարող են թմրամիջոցներ թաքնված լինել»,-հայտնել է իրանցի պաշտոնյան:
Ագիլիի խոսքով` ստուգող սարքավորումների օգնությամբ այդ խմբաքանակում թմրանյութերի առկայությունը հաստատվել է։ Խմբաքանակը բացվել է մաքսատան ներկայացուցչի ներկայությամբ։ Հայտնաբերվել և առգրավվել է 27 կգ հերոին տեսակի թմրամիջոց։