ԵՐԵՎԱՆ, 7 նոյեմբերի – Sputnik. Գազաբալոնների պարտադիր ստուգման համակարգն այնպես չի աշխատում, ինչպես պլանավորված էր: ԱԺ–ում ճեպազրույցի ժամանակ այս մասին հայտարարեց Հայաստանի տարածքային կառավարման և ենթակառուցվածքների նախարար Գնել Սանոսյանը։ Պատճառը, ըստ նախարարի, այն է, որ գազալցման կայանները պատշաճ կերպով ստուգումներ չեն իրականացնում։
«Որոշ կազմակերպություններ բացել են այդ ստուգման կայանները, բայց գումար չեն աշխատում, որովհետև վարորդները չեն գնում ստուգման։ Նրանք չեն գնում ստուգման, որովհետև գազալցակայանը չի պահանջում փաստաթուղթ։ Երբ գազալցակայաններն այլևս չլցնեն գազ ստուգում չանցած ավտոմեքենային, վարորդներն էլ ուշքի կգան ու կգնան ստուգման»,– նշել է նախարարը։
Նախարարը վստահեցրեց, որ այս հարցը լուծելու համար կառավարությունը շարունակում է գործնական քայլեր անել, վստահեցրեց նախարարն ու նշեց, որ հոկտեմբերի 24-ից մինչև նոյեմբերի 4-ը տեսչության մասնագետները 173 կայան են այցելել, 1520 տրանսպորտային միջոց են ստուգել և 234 արձանագրություն կազմել։
«Մեկ մեքենայի համար նախատեսված տուգանքը 200.000 դրամ է և տուգանվում է ոչ թե մեքենայի սեփականատերը, այլ նաև գազալցման կայանը։ Կայաններ կան, որտեղ միանգամից 5 մեքենա է տուգանվել։ Այդ օրերի արդյունքում մենք ունենք 80 միլիոն դրամի տուգանք։ Տեսչության մեր գործընկերների հետ պայմանավորվել ենք գործընթացը շարունակել այնքան, մինչև գազալցման կայանները խելքի կգան և կպահանջեն համապատասխան փաստաթղթեր»,– նշել է Գնել Սանոսյանը։
Հիշեցնենք, որ կառավարության որոշմամբ` օգոստոսի 1-ից տրանսպորտային միջոցների այն գազաբալոնները, որոնք տեղադրված կամ վկայագրված չեն լիցենզավորված կազմակերպության կողմից,չպետք է լիցքավորվեին։