ԵՐԵՎԱՆ, 5 նոյեմբերի – Sputnik. Ուկրաինայում անջատվել է SpaceX ընկերության Starlink արբանյակային ինտերնետի 1300 տերմինալ` սպասարկման վարձը չտալու համար։ Տեղեկությունը հայտնում է CNN-ը։
Նշենք, որ Ուկրաինայում մոտ 25 հազար տերմինալ կա, որոնցից յուրաքանչյուրի սպասարկումը ամսական կազմում է 2500-4500 ԱՄՆ դոլար։
Այս արբանյակները, կարելի է ասել, կենսական նշանակություն ունեն Ուկրաինայի համար։ Դրանք որպես կապի աղբույր են ծառայում անգամ այն դեպքում, երբ պատերազմական իրավիճակի պատճառով բջջային և ինտերնետային ցանցերը խափանվում են։
Ավելի վաղ SpaceX-ը դիմել էր Պենտագոնին՝ ասելով, որ Ուկրաինայում Starlink-ի գործունեության ֆինանսավորման նպատակով ծախսել է գրեթե 100 մլն ԱՄՆ դոլար և այլևս չի կարող դա անել։ Ընկերությունից խնդրել էին պաշտպանության դեպարտամենտից ստանձնել ֆինանսավորման մեծ մասը։ Այս լուրի հրապարակումից օրեր անց, սակայն, Մասկը հայտարարել էր, որ իրենք կշարունակեն անվճար սպասարկել Ուկրաինային։
«Գրողը տանի... Չնայած Starlink-ը շարունակում է գումար կորցնել, մենք պարզապես կշարունակենք անհատույց ֆինանսավորել Ուկրաինայի կառավարությանը»,– գրել էր Իլոն Մասկը Twitter-ում։
«Starlink»–ը նոր սերնդի արբանյակային ցանց է, որը նախատեսված է ամբողջ աշխարհով լայնաշերտ ինտերնետ հասանելիություն ապահովելու համար։ Մասկի «SpaceX» ընկերությունը ուղեծիր է ուղարկել ավելի քան 2.3 հազար «Starlink» արբանյակներ։