ԵՐԵՎԱՆ, 5 նոյեմբերի – Sputnik. ՀՀ պաշտպանության նախարարությունում նոր ծրագիր կմեկնարկի, որի շրջանակում առաջինը հատուկ նշանակության զորքերի զինծառայողները կմասնակցեն ատեստավորման գործընթացին։ Արդյունքում շեշտակիորեն կբարձրանա նրանց աշխատավարձը։ Այս մասին հայտարարել է Հայաստանի պաշտպանության նախարար Սուրեն Պապիկյանը։
«Առաջիկայում կստեղծվեն բոլոր անհրաժեշտ նախադրյալները և պայմանները, որոնք հնարավորություն կընձեռեն բարձրացնելու զինծառայողների մարտական և ֆիզիկական պատրաստվածությունը, ձեռք կբերվեն նոր, արդի պահանջներին համահունչ հետախուզական միջոցներ»,– վստահեցրել է նախարարը։
Նշենք, որ ՀՀ պաշտպանության նախարար Սուրեն Պապիկյանն ու ԶՈւ ԳՇ պետ, պաշտպանության նախարարի առաջին տեղակալ, գեներալ-մայոր Էդվարդ Ասրյանը ՀՀ ՊՆ N զորամասում այսօր մասնակցել են ԶՈւ հետախուզության զորքերի կազմավորման 30-րդ տարեդարձին ու հետախույզի մասնագիտական տոնին նվիրված միջոցառմանը:
Նախարարը հատուկ նշանակության ստորաբաժանումների մի խումբ զինծառայողների պարգևատրել է գերատեսչական մեդալներով, կրծքանշաններով և արժեքավոր նվերներով։ Նախարարը հետմահու պարգևներ է հանձնել զոհված զինծառայողների հարազատներին:
Հիշեցնենք, որ օրեր առաջ պաշտպանության նախարար Սուրեն Պապիկյանն ԱԺ պաշտպանության և անվտանգության հարցերով հանձնաժողովում ներկայացրել էր ՀՀ պաշտպանության նախարարության մշակած զինծառայողների ատեստավորման ծրագիրը, որին հաջորդում է նրանց աշխատավարձի բարձրացումը։
Նախարարը նշել էր, որ եթե այժմ շարքային պայմանագրային զինծառայողը, որը մարտական հերթապահություն չի իրականացնում, ամսական ստանում է միջինը 155 հազար դրամ (մոտ 390 դոլար), իսկ մարտական հերթապահության մեջ գտնվող զինծառայողը՝ մոտ 200 հազար դրամ, ապա ատեստավորումից հետո առաջինները կստանան մոտ 215 հազար դրամ «մաքուր» աշխատավարձ, այսինքն՝ հարկերը հանած, իսկ երկրորդները՝ մինչև 300 հազար դրամ: