ԵՐԵՎԱՆ, 5 նոյեմբերի – Sputnik. ԱԺ նախկին պատգամավոր, նախկին ԱԱԾ ղեկավար, «Հայրենիք» կուսակցության նախագահ Արթուր Վանեցյանը չի բացառում, որ կառաջադրի իր թեկնածությունը Երևանի քաղաքապետի 2023 թվականի ընտրություններում։ Այս մասին նա լրագրողներին ասաց Ֆրանսիայի հրապարակում ընդդիմության հրավիրած հանրահավաքի ժամանակ։
Հարցին` պատրա՞ստ է մրցել «Քաղաքացիական պայմանագրի» թեկնածու Տիգրան Ավինյանի հետ, Վանեցյանն ասաց, որ մյուս տարի կպատասխանի։
«Եթե որոշում կայացնեմ, որ մասնակցելու եմ, կասեմ»,- ասաց նա:
Նշենք, որ Երևանի ավագանու ընտրությունները նախատեսված են 2023 թվականին։ Ընտրություններում իշխող «Քաղաքացիական պայմանագիր» կուսակցության ցուցակը գլխավորելու է Տիգրան Ավինյանը։
Հիշեցնենք` Երևանի Ֆրանսիայի հրապարակում այսօր ընդդիմությունը հանրահավաք է կազմակերպել, որն անցկացվում է «Տե՛ր եմ քեզ, ի՛մ Արցախ» կարգախոսի ներքո։