ԵՐԵՎԱՆ, 4 նոյեմբերի – Sputnik. Ռուսաստանը վավերացրել է ԵԱՏՄ շրջանակներում բուժապրանքների միասնական շուկայի գործունեության անցումային շրջանի երկարաձգման մասին արձանագրությունը։
Համապատասխան հրամանագիրը ստորագրել է ՌԴ նախագահ Վլադիմիր Պուտինը։ Փաստաթուղթը հրապարակված է իրավական տեղեկատվության պաշտոնական հարթակում։
Արձանագրությունը փոփոխություններ է կատարում համաձայնագրի 11-րդ հոդվածում, որը նախատեսում է ժամկետի երկարացում։ Այդ ընթացքում հնարավոր է ԵԱՏՄ օրենսդրությանը համապատասխան գրանցված բժշկական արտադրատեսակների շրջանառությունը, ինչպես նաև անդամ պետությունների օրենսդրությամբ նախատեսված կարգով այդպիսի արտադրատեսակների վերագրանցման (վերաձևակերպման) հնարավորությունը՝ միության օրենսդրությանը համապատասխան բժշկական արտադրատեսակների գրանցմանը անցում կատարելու նպատակով։
Արձանագրությունը ԵԱՏՄ պետությունների կողմից ստորագրվել է 2021 թվականի դեկտեմբերի 30-ին և ժամանակավորապես կիրառվում է 2022 թվականի հունվարի 1-ից։
Արձանագրության դրույթներն ուղղված են միության շրջանակներում բժշկական սարքերի միասնական շուկայի սահուն ձևավորման հնարավորության ապահովմանը` բացառելով 2022 թվականի հունվարի 1-ից հետո ընդհանուր շուկայում բժշկական սարքերի պակասի վտանգը։