ԵՐԵՎԱՆ, 4 նոյեմբեր – Sputnik. 2023թ–ին Հայաստանում կանխատեսվում է շուրջ 36 000 երեխայի ծնունդ, մինչդեռ 2022թ–ին լույս աշխարհ է եկել ավելի քան 37 000 երեխա։ Ժողովրդագրական վիճակագրության այս տարբերությունն այսօր աշխատանքի և սոցիալական հարցերի նախարար Նարեկ Մկրտչյանը մեկնաբանեց 2020թ–ի 44–օրյա պատերազմի բացասական էֆեկտով։
«Գիտեք, որ պատերազմներից հետո կա որոշակի ծնելիության աճ։ 2020թ–ի պատերազմից հետո արձանագրվեց ծնելիության որոշակի աճ։ Բայց այդ տեմպն ընկնելուց հետո շատ արագ չի վերականգնվում, հետևաբար մենք մեր ծրագրերում լավարկումներ ենք իրականացնում` թե՛ երեխա ունեցող ընտանիքների բնակարանի գնման ծրագրեր, թե՛ սահմանամերձ վայրերում բնակարանի գնման հնարավորություն ենք տալիս, որպեսզի մարդիկ ամուսնանալու որոշում կայացնեն, բնակարանի խնդիր լուծեն և այլն։ Բայց մենք ավելի հստակ ռազմավարական փաստաթուղթ ունենալուց հետո ավելի հստակ քաղաքականություն կունենանք»,– ասաց նախարարը ՀՀ ԱԺ–ում հաջորդ տարվա բյուջեի նախագծի ներկայացման ժամանակ` չբացառելով, որ հաջորդ տարի ժողովրդագրական ռազմավարություն մշակելուց հետո նաև ծրագրերի փոփոխություններ կիրականացվեն։
Աշխատանքի և սոցիալական հարցերի փոխնախարար Դավիթ Խաչատրյանն էլ հավելեց, որ երեխա ունեցող ընտանիքների համար կառավարության մշակած բնակապահովման ծրագրերի արդյունքում Հայաստանում ավելացել են երրորդ և չորրորդ երեխաների ծննդյան դեպքերը, մինչդեռ 1-ին ու 2-րդ երեխաների ծնունդները նվազել են։
Նշենք, որ ՄԱԿ–ի տնտեսական և սոցիալական հարցերի դեպարտամենտի կանխատեսման համաձայն, Հայաստանում ծնունդների թիվը 2050թ.-ին կարող է նվազել մինչև 24.000։ Իսկ երկրի բնակչության թիվը 30 տարի հետո կարող է լինել ընդամենը 2,6 միլիոն։
Ժողովրդագրական երկու հիմնական մարտահրավերները Հայաստանի համար շարունակում են մնալ ցածր ծնելիությունն ու արտագաղթը, որին 2020թ–ից հետո ավելացել է նաև պատերազմը և դրա հետևանքով մեծապես տուժող գենոֆոնդը։