ԵՐԵՎԱՆ, 3 նոյեմբերի – Sputnik. Ադրբեջանը պետք է թույլ տա հանել սեպտեմբերին տեղի ունեցած ագրեսիայի հետևանքով զոհված զինծառայողների դիերը։ Այս մասին Երևանում կայացած ասուլիսի ժամանակ հայտարարեց Եվրախորհրդարանի պատգամավոր Ֆաբիո Մասիմո Կաստալդոն։
«Փաստ է, որ այս տարածքում (որտեղ մարտեր են ընթացել. խմբ.) կան դիեր, և դրանք չեն հանձնվել ընտանիքներին պատշաճ հուղարկավորության համար։ Սա անընդունելի է։ Հրադադարի ժամանակ պետք է դիերը վերցնելուհնարավորություն լինի` սպանվածների նկատմամբ հարգանք ցուցաբերելով»,– նշեց նա։
Կաստալդոն խոստացավ խնդիրը ևս մեկ անգամ բարձրացնել Եվրախորհրդարանում։
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ սահմանվեց, որը պարբերաբար խախտում է ադրբեջանական կողմը։
Քննչական կոմիտեն սեպտեմբերի 30-ին հայտնեց, որ ադրբեջանական ագրեսիայի հետևանքով հայկական կողմն ունի 201 զոհ՝ 197 զինծառայող և 4 քաղաքացիական անձ, վիրավորվել է 293 զինծառայող ու 6 քաղաքացիական անձ, գերեվարվել է 20 զինծառայող:
Հոկտեմբերի 4-ին Ադրբեջանը Հայաստանին վերադարձրեց 17 գերիների։
ՀՀ ՊՆ գլխավոր շտաբի պետ Էդվարդ Ասրյանը հոկտեմբերի 31-ին հայտնեց, որ ադրբեջանական կողմը մինչ օրս թույլ չի տալիս, որ սեպտեմբերի 13-ի ագրեսիայի հայկական կողմի զոհերի մարմինները դուրս բերեն։ Նրա խոսքով` Կուտականի ուղղությամբ ԱԹՍ–ով դիտարկում է իրականացվել, և պարզվել է, որ հակառակորդի դիրքի մատույցներում 1 դիակ կա։