ԵՐԵՎԱՆ, 2 նոյեմբերի – Sputnik. ՀՀ երկրորդ նախագահ Ռոբերտ Քոչարյանը մասնակցելու է նոյեմբերի 5-ի կայանալիք միասնության հանրահավաքին: Այս տեղեկությունը Sputnik Արմենիային ասաց ՀՀ երկրորդ նախագահի գրասենյակի ղեկավար Բագրատ Միկոյանը:
Նրա խոսքով` Քոչարյանի ելույթ նախատեսված չէ:
Նշենք, որ նոյեմբերի 5–ին, ժամը 15։00–ին Երևանում կայանալու է ընդդիմության հանրահավաքը։
ՀՀ ԱԺ «Հայաստան» խմբակցության պատգամավոր Իշխան Սաղաթելյանը հայտարարել է, որ նոյեմբերի 5-ին «Դիմադրություն» շարժման հրավիրած հանրահավաքը միասնության հանրահավաք է` միասնություն Արցախի ինքնիշխանության ՀՀ-ի տարածքային ամբողջականության շուրջ։ Նա դիմել է Հայ առաքելական եկեղեցուն և Վեհափառին` ակնկալելով նրա օրհնությունն ու աջակցությունն այդ նախաձեռնությանը։
Սաղաթելյանի խոսքով` նոյեմբերի 5-ից հետո պայքարը շարունակվելու է. հետագա գործողությունների մասին կհայտարարեն հենց հանրահավաքի ժամանակ։
Հիշեցնենք, որ հոկտեմբերի 30-ին Արցախում կայացավ ԱԺ արտահերթ նիստ, իսկ Ստեփանակերտի Վերածննդի հրապարակում միաժամանակ ընթանում էր բազմահազարանոց հանրահավաք, որին մասնակցում էին Արցախի նախագահ Արայիկ Հարությունյանը, նախկին նախագահներ Բակո Սահակյանն ու Արկադի Ղուկասյանը, ներքին գործերի նախարար Կարեն Սարգսյանը։
Ե՛վ նիստում, և՛ հանրահավաքի ժամանակ հնչեց հստակ ուղերձ` Արցախը երբեք չի եղել և չի լինելու Ադրբեջանի կազմում։