Արտոնություններն արդյունք չեն տվել. Փաշինյանը դժգոհ է ցեմենտի տեղական արտադրողներից

ԵՐԵՎԱՆ, 2 նոյեմբերի – Sputnik. Ցեմենտի տեղական արտադրողներին տրված արտոնություններն արդյունք չեն տվել։ Այսօր ԱԺ–ում նման եզրակացություն հնչեցրեց ՀՀ վարչապետ Նիկոլ Փաշինյանը` անդրադառնալով ցեմենտի շուկայում ստեղծված իրավիճակին։

Վարչապետն ընդգծեց, որ այսուհետ կառավարությունը պետք է ավելի ուշադիր լինի արտոնությունների ու աջակցության հարցում։

«Մենք չպետք է տնտեսության մեջ պալիատիվ քաղաքականություն վարենք, որը միայն վնաս է բերում։ Այսինքն` մենք օգնենք ընկերություններին, որպեսզի իրենք ուղղակի գործի գնան, գան և տնտեսությանն անհրաժեշտ արդյունք չապահովեն, դա իմ կարծիքով` մի քաղաքականություն է, որից մենք պետք է հրաժարվենք»,– ասաց Փաշինյանը։

Հիշեցնենք` երեկ ԱԺ–ում Մրցակցության պաշտպանության հանձնաժողովի անդամ Հայկ Կարապետյանը հայտնել էր, որ հանձնաժողովն ուսումնասիրում է շուկան` պարզելու արդյոք ցեմենտի դեֆիցիտն արհեստական է ստեղծվել, թե բնական երևույթ է։ Հանձնաժողովի վերջնական դիրքորոշումը կհրապարակվի առաջիկա 10 օրվա ընթացքում։

Նշենք, որ մինչ այդ շուրջ 1 ամիս կառավարությունն ահազանգում էր ցեմենտի շուկայում առաջացած դեֆիցիտի մասին, որն արդեն ազդում էր նաև պետական շինարարական ծրագրերի իրականացման ընթացքի վրա։

Դեֆիցիտի ու ներկրվող ցեմենտի բարձր տուրքի հետևանքով 50 կգ–անոց 1 պարկ տեղական արտադրության ցեմենտի գինը շուկայում 2 900 դրամ է, իրանականը` 3 000-3 500։

Իրավիճակը շտկելու համար ԱԺ-ն հոկտեմբերի 5–ին ընդունեց «Քաղաքացիական պայմանագիր» խմբակցության պատգմավորներ Բաբկեն Թունյանի ու Հովիկ Աղազարյանի հեղինակած օրենսդրական նախագիծը, որով ցեմենտի ներկրման տուրքը գործող 14 000 դրամից դարձավ 2 հազար դրամ։ Իրանական ցեմենտն այսուհետ Հայաստան կներկրվի 1 տոննայի դիմաց 2000 դրամ պետական տուրքով, իսկ ցեմենտի հումքը` կլինկերը` առանց տուրքի։

Նշենք, որ ՀՀ ներկրվող ցեմենտի դիմաց տուրքը սահմանվել էր 2019թ–ին` տեղական արտադրողներին պաշտպանելու նպատակով։ 2021 թվականի մայիսից նույն հիմնավորմամբ պետտուրք սահմանվեց նաև ցեմենտի հումքի` կլինկերի ներկրման համար` 1 տոննայի դիմաց 2 000 դրամ։