ԵՐԵՎԱՆ, 1 նոյեմբերի – Sputnik. Երևանի Արաբկիր թաղամասում ծառայություն իրականացրած պարեկները բացահայտել են ապօրինի թմրաշրջանառության 2 դեպք, հայտնում է ոստիկանությունը։
Նշվում է, որ պարեկները հոկտեմբերի 30-ի երեկոյան Ղափանցյան փողոցում ձերբակալել և բաժին են տեղափոխել Երևանի բնակիչ 24-ամյա մի երիտասարդի։ Նրան խուզարկելով հայտնաբերվել են դեղնականաչավուն զանգված՝ 76 գրամից ավելի քաշով, նախնական տվյալներով՝ մարիխուանա, գաղտնի փականով դանակ ու հուշանվեր կացին:
Իսկ հոկտեմբերի 31-ին պարեկներն Արամ Խաչատրյան փողոցում ձերբակալել են Երևանի բնակիչ, 28-ամյա մի երիտասարդի։ Նա ևս տեղափոխվել է բաժին ու խուզարկվել։ Հայտնաբերվել են մարիխուանայի նմանվող զանգվածով փաթեթ՝ 4 գրամից ավելի քաշով, կաթուցիչներ։
Երկու դեպքով էլ կատարվում է նախաքննություն։