ԵՐԵՎԱՆ, 1 նոյեմբերի – Sputnik. Հոկտեմբերի 31-ին թևավոր հրթիռներով ՌԴ ԶՈւ–ի ինտենսիվ հարվածը խաթարել է ուկրաինական զորքերի կառավարումը և նրանց թիկունքային ապահովումը։ Այս մասին այսօր հայտնել է ՌԴ ՊՆ-ն։
Նշել են, որ այդ քայլով էապես դժվարացել են երկաթուղային տրանսպորտով պահուստի և նյութական միջոցների տեղափոխումը մարտական գործողությունների շրջաններ։ Բացի այդ Ուկրաինայի ռազմարդյունաբերական համալիրներում արտադրությունը խափանվել է։
«Նիկոլաև-Կրիվոյ Ռոգ ուղղությամբ ՌԴ զորքերի ակտիվ գործողություների շնորհիվ կանխվել են Խերսոնի մարզի բնակավայրերի ուղղությամբ Ուկրաինական ԶՈւ ստորաբաժանումների գրոհների փորձերը։ Հակառակորդը հետ է շպրտվել ելման դիրքեր։ Ոչնչացվել է ավելի քան 110 ուկրաինացի զինծառայող, մեկ տանկ, 8 մարտական զրահամեքենա և 8 պիկապ», – ասվում է ամփոփագրում։
Նախարարությունից հայտնել են, որ մեկ օրում ուկրաինացի զինվորականներն ավելի քան 20 արկ են արձակել Էներգոդարի հյուսիս–արևմտյան ծայրամասում և Զապորոժիեի ԱԷԿ–ին հարող տարածքներում։ Հակառակորդի կրակային միջոցները ճնշվել են, ռադիացիոն իրավիճակը ԶԱԷԿ–ում շարունակում է մնալ նորմայի մեջ։
ՌԴ հրետանային ստորաբաժանումների պատասխան կրակով ճնշվել են հակառակորդի գործողությունները։
«Ատոմակայանի շրջանում ռադիացիոն իրավիճակը շարունակում է մնալ նորմայի սահմաններում», – ընդգծել են ՊՆ–ում։
«Կուպյանսկի ուղղությամբ հակառակորդը ԼԺՀ–ի և Խարկովի մարզի բնակավայրերը գրոհելու անհաջող փորձեր է ձեռնարկել գումարտակային մարտավարական խմբի կիրառմամբ, որն ուժեղացվել է վարձկանների օգնությամբ։ Բոլոր գրոհները հետ են շպրտվել։ Կրակային խոցման հետևանքով հակառակորդը ավելի քան 150 ուկրաինացի զինծառայող և գրոհային, երեք տանկ, մարտական 4 զրահամեքենա և 6 պիկապ է կորցրել», – ասվում է գերատեսչության հաղորդագրության մեջ։
Բացի այդ, ՊՆ-ից հայտնել են, որ Կրասնոլիմանի ուղղությամբ ուկրաինական զորքի վաշտային մարտավարական խմբերին հասցված կանխարգելիչ հրետանային կրակով և ՌԴ ԶՈւ ստորաբաժանումների գործողությունների շնորհիվ ձախողվել է ԼԺՀ–ի բնակավայրերի ուղղությամբ հակառակորդի գրոհի անցնելու փորձերը։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 250-րդ օրը։