ԵՐԵՎԱՆ, 1 նոյեմբերի – Sputnik. Հայաստանում աշխատավարձերը բարձրանում են, թափուր աշխատատեղերը չեն լրացվում, գործազրկությունը չի նվազում։ Հայաստանյան աշխատաշուկայի նման ֆենոմենալ զարգացման մասին այսօր հրավիրված ասուլիսում խոսեց ՀՀ ԿԲ նախագահ Մարտին Գալստյանը։
«Մենք արդեն անեկդոտալ պատմություններ ենք լսում, որ հայկական ընկերությունները սկսում են դրսից վարձու աշխատողներ բերել իրենց կարիքները հոգալու համար։ Աշխատավարձերի բավական բարձր մակարդակ կա շինարարության ոլորտում, առևտրի, ծառայությունների ոլորտում, որը, ըստ էության, դրդում է հայկական ընկերություններին այդ պակասը կամ բացը լրացնել այլ երկրների աշխատուժի հաշվին», – ասաց Գալստյանը։
ԿԲ–ում, նրա խոսքով, հետևում են ֆենոմենալ զարգացումներին, իսկ մինչ այդ արձանագրում` գերտաքացած իրավիճակը ՀՀ աշխատաշուկայում այս պահին դեռ պահպանվում է։
Պաշտոնական տվյալներով` միայն այս տարվա սեպտեմբերին Հայաստանում 10 037 նոր աշխատատեղ է գրանցվել։
ՀՀ միջին աշխատավարձն 2022թ-ի սեպտեմբերի դրությամբ անցյալ տարվա սեպտեմբերի համեմատ ավելացել է 35 769 դրամով։
Աշխատողների ու աշխատավարձերի նման աճը հայաստանյան շատ փորձագետներ պարզաբանում են ռուսաստանցի ռելոկանտների ներհոսքով։ Հայտնի է, որ ռուս–ուկրաինական ճգնաժամի ու արևմտյան պատժամիջոցների հետևանքով ՌԴ շատ քաղաքացիներ իրենց բիզնեսը տեղափոխել են Հայաստան, այդ թվում` գրանցվելով ՀՀ աշխատաշուկայում ու բանկային համակարգում։