ԵՐԵՎԱՆ, 31 հոկտեմբերի – Sputnik. ՀՀ արտակարգ իրավիճակների նախարարությունը պատրաստվում է ոչնչացնել «Նաիրիտ» գործարանի քիմիական նյութերը։ Այս մասին ԱԺ պաշտպանության և անվտանգության հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստի ընթացքում հայտարարեց ԱԻՆ աշխատակազմի ղեկավար Լիլիթ Միրզախանյանը։
Նախարարությունն արդեն իսկ Ֆինանսների նախարարություն դիմում է ներկայացրել, որպեսզի 35 քիմիական նյութ ոչնչացնելու համար միջոցներ տրամադրվեն։ Դրանց պաշարները պահվում են գործարանում։ 34 նյութ կարելի է ոչնչացնել հայտնի մեթոդներով, սակայն հայտնի չէ, թե «լաքեթինոլ» անվամբ նյութից ինչպես կարելի է ազատվել։ Նշվել է, որ նման տեխնոլոգիայի չեն տիրապետում անգամ արտասահմանյան մասնագետները, դրա համար ՇՄԱԳ (շրջակա միջավայրի վրա ազդեցության գնահատում) է պետք։
«Հայաստանցի գիտնականները զբաղվում են լաքեթինոլի ոչնչացման տարբերակ գտնելու հարցով, այդ խնդրով դիմել ենք նաև միջազգային տարբեր կազմակերպություների։ Լաքեթինոլի ինքնայրումը պայթյուն կարող է առաջացնել»,– ասաց Միրզախանյանը։
Իր հերթին «Քաղաքացիական պայմանագիր» խմբակցության պատգամավոր Գևորգ Պապոյանը հայտարարեց, որ պետությունը պետք է մի քանի տասնյակ մարդ պահի, որոնք պատասխանատու են վտանգավոր նյութերի պահպանման պայմանների համար։
Նրանք, մասնավորապես, հետևում են, որ քիմիական նյութերը չբռնկվեն կամ չպայթեն +32–ից բարձր ջերմաստիճանում։