ԵՐԵՎԱՆ, 30 հոկտեմբերի – Sputnik. «Դիմադրություն» շարժումը նոյեմբերի 5-ին հրավիրում է հանրահավաքի` ի պաշտպանություն Արցախից հնչեցված պահանջների։ Տեղեկությունը «Ֆեյսբուքի» իր էջում հայտնել է ՀՀ ԱԺ «Հայաստան» խմբակցության պատգամավոր Իշխան Սաղաթելյանը։
Նշենք, որ վերջինս հոկտեմբերի 28-ին հայտնել էր, որ Արցախի ԱԺ արտահերթ նիստից և հանրահավաքից հետո կներկայացնի ընդդիմության առաջիկա անելիքներն ու պայքարի մեթոդները։
«Մեր պարտքն ու պարտականությունն է անսալ Արցախի ձայնին։ Իբրև հայ, իբրև ՀՀ քաղաքացի, իբրև արժանապատիվ մարդ տեր կանգնել Արցախին և Հայաստանին»,– գրել է պատգամավորը։
Վաղը ժամը 12։00-ին Սաղաթելյանը հանդես է գալու մամուլի ասուլիսով, որտեղ խոսելու է հանրահավաքի և ընդդիմության առաջիկա անելիքների մասին։
Հիշեցնենք, որ հոկտեմբերի 30-ին Արցախում կայացավ ԱԺ արտահերթ նիստ, իսկ Ստեփանակերտի Վերածննդի հրապարակում միաժամանակ ընթանում էր բազմահազարանոց հանրահավաք, որին մասնակցում էին Արցախի նախագահ Արայիկ Հարությունյանը, նախկին նախագահներ Բակո Սահակյանն ու Արկադի Ղուկասյանը, ներքին գործերի նախարար Կարեն Սարգսյանը։
Ե՛վ նիստին, և՛ հանրահավաքին հնչեց հստակ ուղերձ` Արցախը երբեք չի եղել և չի լինելու Ադրբեջանի կազմում։
Խորհրդարանը նաև մի հայտարարություն ընդունեց` դիմելով Ռուսաստանի Դաշնութանը` Արցախի ժողովրդի անվտանգությունն ապահովելու հանձնառությունը շարունակելու խնդրանքով։ Հայտարարությամբ առաջարկվեց նաև ներդնել ռազմական և քաղաքական լրացուցիչ մեխանիզմներ` հաշվի առնելով Արցախի ժողովրդին սպառնացող գոյաբանական վտանգները։