ԵՐԵՎԱՆ, 29 հոկտեմբերի – Sputnik. Հայաստանի և Ադրբեջանի միջև կա սահման, որը խախտել է Ադրբեջանը։ ՀԱՊԿ-ը և ՌԴ–ն ունեն պարտավորություններ, որոնց «զանգը հնչել է»։ Այս մասին «Քաղաքացիական պայմանագիր» կուսակցության 6-րդ համագումարի ժամանակ հայտարարեց կուսակցության հիմնադիր, ՀՀ վարչապետ Նիկոլ Փաշինյանը։
«Ադրբեջանը ագրեսիա է իրականացրել ՀՀ-ի դեմ և օկուպացիա է իրականացրել Հայաստանի տարածքում։ Ես ակնկալում էի, որ սեպտեմբերի 13-ին ՀԱՊԿ-ը նման գնահատականով հանդես կգա։ ՀԱՊԿ-ը դիտորդներ ուղարկեց և երեկվա նիստում արձանագրվեց այն, ինչի մասն բոլորը գիտեն՝ օկուպացվել են ՀՀ տարածքներ։ Հիմա իմ դիրքորոշումը հետևյալն է՝ դիտորդական առաքելությունը արձանագրել է այն, ինչ-որ տեղի է ունեցել, և պետք է քաղաքական գնահատական տանք»,–ասաց ՀՀ վարչապետը։
Փաշինյանն ընդգծեց, որ անհրաժեշտ է ճանապարհային քարտեզ ՀՀ տարածքային ամբողջականությունը վերականգնելու համար, և դա ոչ թե անձնական ցանկություն է, այլ նախատեսված է ՀԱՊԿ-ի հիմնարար փաստաթղթերով։
«Ճանապարհային քարտեզը կարող է լինել հետևյալը՝ դիվանագիտական ճանապարհով աշխատանք Արդբեջանի հետ, և եթե դիվանագիտական ճանապարհով չի աշխատում, ՀԱՊԿ-ը պետք է արդեն ուժային գործունեություն պլանավորի Հայաստանի՝ անդամ պետության տարածքային ամբողջականությունը վերականգնելու համար»,-ասաց վարչապետը՝ հավելելով, որ որոշվել է արտաքին գործերի նախարարներին հանձնարարական տալ այդ խնդիրը լուծելու համար։
Նրա խոսքով` երբ Ադրբեջանը հարձակվեց Սոթք–Խոզնավար հատվածի վրա և ՀՀ–ն բարձրաձայնեց, թե խախտվել են Հայաստանի համար իր կարմիր գծերը` իրենց պատասխանել են, թե սահմանազատում դեռ չի իրականացվել։
Ըստ Փաշինյանի` ասել, թե հայտնի չէ` ՀՀ սահմանը որտեղով է անցնում, նշանակում է ասել, որ ՀԱՊԿ–ը գոյություն չունի։
Վարչապետի խոսքով` երեկվա ՀԱՊԿ նիստում արձանագրվել է, որ Ադրբեջանը օկուպացրել է Հայաստանի տարածքը։