ԵՐԵՎԱՆ, 28 հոկտեմբերի – Sputnik. ՀՀ վարչապետ Նիկոլ Փաշինյանն ընդունել է Ինտերպոլի գլխավոր քարտուղար Յուրգեն Շտոքին: Ինչպես հայտնում են վարչապետի մամուլի ծառայությունից, վարչապետը կարևորել ՀՀ ոստիկանության և Ինտերպոլի միջև համագործակցության հետևողական զարգացումն ու ընդլայնումը:
Նիկոլ Փաշինյանը վստահություն է հայտնել, որ այցի շրջանակում տեղի ունեցող քննարկումները նոր ազդակ կհաղորդեն շուրջ երեք տասնամյակ շարունակվող փոխգործակցությանը, էլ ավելի կբարձրացնեն համատեղ աշխատանքի արդյունավետությունը՝ հանցավորության դեմ պայքարում:
Ինտերպոլի գլխավոր քարտուղարը բարձր է գնահատել ՀՀ ոստիկանության հետ համագործակցության մակարդակը և անդրադարձել առաջիկայում նախատեսվող համատեղ ծրագրերին ու փոխգործակցության օրակարգին:
Հանդիպմանը մասնակցել է նաև ՀՀ ոստիկանության պետ Վահե Ղազարյանը:
Ինտերպոլի գլխավոր քարտուղար Յուրգեն Շթոքը հոկտեմբերի 27-ին ՀՀ ոստիկանության պետի հրավերով երկօրյա աշխատանքային այցով ժամանել է Հայաստան։
ՀՀ ոստիկանության պետ Վահե Ղազարյանի հետ հանդիպմանը Ինտերպոլի ղեկավարի հետ քննարկվել են կիբեռհանցավորության ու թվային տեխնոլոգիաների կիրառմամբ կատարվող ֆինանսական բնույթի հանցագործությունների, թմրանյութերի ապօրինի շրջանառության կազմակերպված հանցավորության դեմ համատեղ պայքարի մեխանիզմները։