Հայկական գարեջուրը կարող է լավ վաճառվել ՌԴ-ում, բայց խանգարում է «ամուր» դրամը. գործարար

Հայ գարեջրագործները Ռուսաստան արտահանումն ավելացնելու լավ հնարավորություն ունեն, սակայն նրանց խանգարում է հայկական դրամի ամրապնդված փոխարժեքը։ Այս մասին Sputnik Արմենիայի հետ զրույցում ասել է «Երևանի գարեջուր» գործարանի գլխավոր տնօրեն Աշոտ Բաղդասարյանը։

Մարտին ռուսական շուկայից հեռանալու մասին հայտարարել էին Carlsberg-ը, Heineken-ը և այլ խոշոր արտասահմանյան արտադրողներ։ Ավելի ուշ Ռուսաստանի գարեջուր արտադրողների ասոցիացիայի գործադիր տնօրեն Վյաչեսլավ Մամոնտովը հայտարարել էր, որ նրանք կդադարեցնեն իրենց հիմնական ապրանքանիշերի արտահանումը Ռուսաստան (այսինքն` նույն Carlsberg-ի, Heineken-ի և այլն), բայց կշարունակեն արտադրել ռուսական ապրանքանիշերը, որոնց գործարանների սեփականատերն են հանդիսանում։

Խնդիրը մասամբ մեղմվում է ներկրման շահույթով (եթե ուժեղ դրամը խանգարում է արտահանմանը, ապա ներմուծման նույն չափով էլ շահավետ է)։ Դրա շնորհիվ գարեջրի գործարանը ներկայումս Ռուսաստանից ածիկը ներմուծում է ավելի շահավետ (դրամով վերահաշվելիս) գնով։

Հարցին, թե արդյոք տեղական ածիկը արտադրվում է Գյումրու գործարանում (այդ ածիկի գործարանը պատկանում է «Երևանի գարեջուր» և «Գյումրի գարեջուր» ընկերություններին), Բաղդասարյանը պատասխանեց, որ գործարանը ժամանակավորապես դադարեցրել է գարու մթերումը ֆերմերներից բարձր գների պատճառով։

Գործարանում հին արտադրական հոսքագիծ կա, որը պատրաստվում էին նորով փոխարինել։ Սարքավորումների մոտ 85 տոկոսը արդեն բերվել է Եվրոպայից և տեղադրվել, սակայն աշխատանքն ավարտին հասցնել չի հաջողվել. սկզբումլոգիստիկ դժվարությունների, այնուհետև մետաղների ավելացած գների պատճառով (որին համապատասխան եվրոպացի արտադրողները բարձրացրել են սարքավորումների գները):

Նշենք, որ 2022 թվականի առաջին կիսամյակում Հայաստանից գարեջրի արտահանումն աճել է` 670-ից հասնելով մինչև 1 մլն 20 հազար դոլարի։ Արտահանման հիմնական շուկան շարունակում է մնալ Ռուսաստանը. այդ երկիր արտահանումը մոտ 470 հազարից հասել է մոտ 900 հազար դոլարի։
Հիշեցնենք, որ մարտ ամսից դոլարի նկատմամբ հայկական դրամի փոխարժեքն աճել է մոտ 15%-ով (հիմնականում ռուս ֆինանսիստների և ծրագրավորողների մեծ ներհոսքի պատճառով, որոնք եկամուտը ստանում են հիմնականում արտարժույթով)։