ԵՐԵՎԱՆ, 27 հոկտեմբերի – Sputnik. Մինչև տարեվերջ հնարավոր չի լինի սահմանագծման և սահմանազատման գործընթացն ավարտել։ Խորհրդարանական ճեպազրույցների ժամանակ ասաց ՔՊ–ական պատգամավոր, ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը` պատասխանելով, թե հնարավո՞ր է մինչև տարեվերջ` խաղաղության պայմանագրի հավանական կնքումը, սահմանագծում և սահմանազատում իրականացվի։
«Ժամանակային սահմանափակումը պետք է խոչընդոտ չլինի դելիմիտացիայի և դեմարկացիայի համար, եթե ժամանակային սահմանափակում դնենք, դա ոչ մի տեղ մեզ չի հասցնի։ Գլխավորն այն է, որ մենք համաձայնենք` այդ պրոցեսը լինի շարունակական և անկաշկանդ»,–ասաց Քոչարյանը։
Նրա խոսքով` կարևորն այն է, որ սեղանին լինի միջազգայնորեն ճանաչված այնպիսի փաստաթուղթ, որ կարողանան դրա շրջանակներում աշխատել։
Ինչ վերաբերում է մինչև տարեվերջ Ադրբեջանի հետ խաղաղության պայմանագրի կնքման իրատեսական լինելուն` Քոչարյանը նշեց, որ շատ են շահագրգռված, որ այն դառնա իրականություն։ Նա հավելեց, որ դեմարկացիայի և դելիմիտացիայի խնդիրները նաև փոխկապակցված են այդ փաստաթղթի հետ։ Սակայն դրանք միաժամանակյա լուծում ստանալու պարտադիր պայման չունեն` երկու փաստաթղթեր են՝ որպես մեկը մյուսին հաղորդակից խողովակներ։
Հիշեցնենք, որ երեկ ԱԺ–ում կառավարության հետ հարցուպատասխանի ժամանակ վարչապետ Նիկոլ Փաշինյանը հայտնել էր` ցանկանում է, որ Ադրբեջանի հետ խաղաղության պայմանագիրը կնքվի մինչև այս տարեվերջ։ Նա հավելել էր, թե հույս ունեն, որ մինչև խաղաղության պայմանագրի ստորագրումն ավարտված լինեն դելիմիտացիայի աշխատանքները։