ԵՐԵՎԱՆ, 27 հոկտեմբերի - Sputnik. Միայն իրական և մարդկանցից չկտրված տեղական ժողովրդավարությունն է, որ կարող է օգնել պահպանելու այդ նույն մարդկանց հավատը ժողովրդավարական ինստիտուտների արդյունավետության նկատմամբ: Այս մասին Ստրասբուրգում Եվրոպայի խորհրդի տեղական և տարածաշրջանային իշխանությունների կոնգրեսի 43-րդ լիագումար նիստի ժամանակ իր ելույթում ասել է ՀՀ ԱԺ «Հայաստան» խմբակցության պատգամավոր, ԵԽԽՎ-ում ԱԺ պատվիրակության անդամ Արմեն Գևորգյանը, հայտնում է ՀՀ ԱԺ մամուի ծառայությունը։
«Աշխարհը փոխվում է` ստեղծելով նոր իրողություններ և առաջ բերելով նոր մարտահրավերներ: Այս հարցերը քննարկվում են կա՛մ համաշխարհային մակարդակում, կա՛մ էլ ազգային: Մինչդեռ հասարակ մարդկանց կյանքում հիմնական փոփոխությունները տեղի են ունենում տեղական մակարդակում: Կյանքի որակն առաջին հերթին փոխակերպվում է համայնքներում: Մարտահրավերները, որոնց բախվել ենք վերջին տասնամյակում, ինչպես նաև եվրոպական անվտանգության ամբողջ ճարտարապետության խորը վերափոխումը, ընդհանուր առմամբ թուլացնում են ամբողջ եվրոպական մայրցամաքում բարեկեցիկ և ապահով ապագայի նկատմամբ լավատեսությունը»,-ասել է Գևորգյանը:
Նրա խոսքով` ներքին և արտաքին սպառնալիքներին կառավարությունների դանդաղ արձագանքը նվազեցնում են հասարակության վստահությունը ժողովրդավարական կառավարման ինստիտուտների արդյունավետության նկատմամբ:
«Պետք է ընդունենք, որ դա թուլացնում է մեր արժեհամակարգը, որին բոլորս պետք է անվերապահորեն հավատարիմ մնանք»,-ասել է Գևորգյանը:
ԵԽԽՎ-ում ԱԺ պատվիրակության անդամի խոսքով՝ «նոր նորմա» կա, որ որոշ երկրներում համապետական ընտրությունները ճանապարհ են հարթում «մեծամասնության դիկտատուրայի» ձևավորման համար, որն, ըստ Գևորգյանի, օգտագործում է իր կասկածելի ժողովրդավարական լիազորությունները, որպեսզի պահանջի տեղական և տարածաշրջանային իշխանությունների լիակատար հավատարմությունը:
Նա նշել է, որ տեղական ժողովրդավարության ինստիտուտները պետք է շարունակեն մնալ արդարության և քաղաքացիների հավասար մասնակցության սկզբունքների հավատի պատվարները:
Արմեն Գևորգյանն առաջարկել է ԵԽ-ի և այլ համապատասխան և շահագրգիռ հաստատություններ ու կազմակերպությունների մասնակցությամբ նոր համաեվրոպական դիսկուրս սկսել տեղական ժողովրդավարության զարգացման և ամրապնդման հարցերի շուրջ։