ԵՐԵՎԱՆ, 27 հոկտեմբերի – Sputnik. Հայաստանի 305 դպրոցների շենքեր սեյսմիկ վտանգ են ներկայացնում սովորողների ու աշխատողների համար։
Այս մասին այսօր հայտարարվեց ՀՀ կառավարության նիստում` Տարածքային կառավարման ու ենթակառուցվածքների նախարարության դպրոցաշինության ծրագրում առաջարկած փոփոխությունների նախագծի քննարկման ժամանակ։
«Ծրագրի հստակեցման համար սեյսմիկ վտանգավոր դպրոցների ցանկի վերանայման կարիք կա, գումարների վերանայման կարիք կա»,– ասաց նախարար Գնել Սանոսյանը։
Մասնավորապես` նախարարությունն առաջարկում է նախկինում սեյսմավտանգ համարված 437 դպրոցների ցանկից հանել արդեն կառուցված ու դեռ կառուցվող 63-ը, ինչպես նաև այն դպրոցները, որոնք այս տարիների ընթացքում դադարել են շահագործվել։
Նախագիծը ներկայացնելիս Սանոսյանը հայտնեց, որ 2015 -2022 թվականներին իրականացվել են շուրջ 63 դպրոցների կառուցման, վերակառուցման ու հիմնանորոգման աշխատանքներ, որոնց մի մասը դեռ ընթացքի մեջ են, ուստի հետագա 8 տարում շուրջ 305 դպրոցների վերակառուցումն անիրատեսական է։
Առաջարկվում է նաև վերանայել ծրագրի ժամկետը` 2030թ–ի փոխարեն սահմանելով մինչև 2035 թվականը։
Վերոհիշյալ 63 դպրոցների շինարարության աշխատանքների արժեքը կազմել է 159,5 մլրդ դոլար, իսկ 2022-30 թվականների ծրագրում նախատեսված դպրոցների համար անհրաժեշտ կլինի ևս 1տրիլիոն 519 մլրդ ԱՄՆ դոլար։
Դպրոցների շինարարության ծրագրին աջակցում են Ասիական զարգացման բանկն ու Համաշխարհային բանկը։ Որոշ աշխատանքներ իրականցվում են պետական բյուջեի միջոցներով։