ԵՐԵՎԱՆ, 26 հոկտեմբերի – Sputnik. Ռուս քիմիկոսները հայտնաբերել են ֆունգիցիդների նոր դաս, որոնք արդյունավետ են մշակաբույսերի սնկային հիվանդությունների դեմ պայքարում։ Հետազոտության հեղինակներից մեկը՝ Ռուսաստանի գիտությունների ակադեմիայի Օրգանական քիմիայի ինստիտուտի փոխտնօրեն Ալեքսանդր Տերենտևը, Sputnik Արմենիային տված հարցազրույցում նշեց, որ ֆունգիցիդների արտադրությունը խոշոր ֆինանսական ներդրումներ չի պահանջում։ Բացի այդ, դրանք շրջակա միջավայրի համար վտանգ չեն ներկայացնում։
Իսկ դա նշանակում է, որ ռուս գիտնականների հայտնագործությունը կարող է լավ այլընտրանք լինել արտասահմանյան անալոգներին, որոնք լայնորեն կիրառվում են գյուղատնտեսության մեջ, այդ թվում նաև Հայաստանում։
«Դրանց արտադրությունը զգալիորեն ավելի էժան է, բացի այդ, այն կարելի է տեղում հիմնել։ Արտասահմանյան ֆունգիցիդներն ավելի թանկ են, դրանց մատակարարումները կարող են ցանկացած պահի դադարեցվել, կամ դրանց գները կարող են բարձրանալ», - ասել է Տերենտևը։
Գիտնականը պարզաբանեց, որ ֆունգիցիդները նյութեր են, որոնք ոչնչացնում են սնկերը և ոչ մի վնաս չեն հասցնում բույսերին։ Դրանք օգտագործվում են գյուղատնտեսական մշակաբույսերի, ինչպես նաև տարածքների մշակման ժամանակ։
Նա նշեց, որ սնկային հիվանդություններն ազդում են բոլոր բույսերի վրա, ու դա գյուղատնտեսության կորուստների հիմնական պատճառն է: Տերենտևը վստահություն հայտնեց, որ Հայաստանում կարելի է արդյունավետ օգտագործել ֆունգիցիդների նոր տեսակը նաև գյուղատնտեսական մշակաբույսերի սնկային հիվանդությունների դեմ պայքարում։
Ռուս գիտնականը պարզաբանեց, որ ֆունգիցիդները կարող են օգտագործվել ինչպես սերմերի մշակման ժամանակ, այնպես էլ բերքահավաքից հետո։