ԵՐԵՎԱՆ, 26 հոկտեմբերի – Sputnik. ԱՄՆ պետքարտուղար Էնթոնի Բլինկենն ու Իսրայելի նախագահ Իցհակ Հերցոգը Վաշինգտոնում երեկ կայացած հանդիպմանը քննարկել են հարցեր, որոնք առնչվում են Ուկրաինայում ՌԴ հատուկ գործողությունների անցկացմանն ու տարածաշրջանում Իրանի «վնասաբեր ազդեցությանը»։ Այս մասին ասվում է Պետդեպի մամուլի ծառայության ղեկավար Նեդ Փրայսի` Պետդեպի կայքում հրապարակված հայտարարության մեջ։
Ինչպես նշել է Փրայսը, Բլինկենն ու Հերցոգը խոսել են նաև արաբական երկրների հետ Իսրայելի հարաբերությունների խորացման հնարավորությունների մասին։
Ամերիկյան դիվանագիտության ղեկավարն ընդգծել է, որ ԱՄՆ–ն մտահոգված է Արևմտյան ափին բարձր լարվածության, բռնության և իսրայելցիների ու պաղեստինցիների մահվան առնչությամբ, ինչպես նաև նշել, որ բոլոր կողմերն անհապաղ պետք է ապահովեն դեէսկալացիան։
Միևնույն ժամանակ Պենտագոնի մամուլի ծառայությունը հայտնել էր, որ քաղաքական գործերով ԱՄՆ ռազմական գերատեսչության նախարարի տեղակալ Քոլին Քոլն ու Իսրայելի պաշտպանության նախարարության գլխավոր տնօրեն Ամիր Էշելը նույնպես երեկ հանդիպում են ունեցել։ Նրանք խոսել են Իրանի միջուկային զենք ստանալը կանխելու, ինչպես նաև տարածաշրջանում և դրա սահմաններից դուրս ապակայունացմանն ուղղված նրա քայլերին հակազդելու հարցում ԱՄՆ–ի և Իսրայելի ընդհանուր համերաշխության մասին։