ԵՐԵՎԱՆ, 24 հոկտեմբերի - Sputnik. Մ.Վ. Լոմոնոսովի անվան Մոսկվայի պետական համալսարանի աշխարհագրական ֆակուլտետի օվկիանոսաբանության ամբիոնի ավագ դասախոս Սերգեյ Մուհամեդովը ՌԻԱ Նովոստիի հետ զրույցում ասել է, որ մարտական դելֆինները կարող են ներգրավվել Սևաստոպոլի ծոցը ստորջրյա դիվերսանտներից պաշտպանելու համար։
Ավելի վաղ ամերիկյան 19Fortyfive պարբերականում սյունակագիր Բլեյք Սթիլվելը հայտարարել էր, որ Ռուսաստանը կարող է մարտական դելֆիններ օգտագործել Սև ծովում ուկրաինացի դիվերսանտների դեմ պայքարելու համար:
«Մարտական դելֆիններն իսկապես զբաղվում են հակադիվերսիոն աշխատանքով, այդ թվում՝ նրանք կարող են պաշտպանել Սևաստոպոլի ծոցի մուտքը», - ասել է Մուհամեդովը:
Նրա խոսքով՝ դելֆինները վաղուց են օգտագործվում դիվերսանտների որոնման գործում, ու դրանում «ոչ մի յուրահատուկ բան» չկա։ Աշխատանքները սկսվել են 60-ականների վերջին ինչպես ԽՍՀՄ-ում, այնպես էլ ԱՄՆ-ում։ Խորհրդային Միությունում գլխավոր կենտրոնը Սև ծովի Սևաստոպոլի ծոցում էր։ Որոշ դելֆիններ պատրաստվում էին ստորջրյա դիվերսանտների, մյուսները՝ ստորջրյա ականների որոնման համար։
«ԽՍՀՄ փլուզման և Սևծովյան նավատորմի բաժանման ժամանակ դելֆիններով ստորաբաժանումը բաժին էր հասել Ուկրաինային, և նրանք գործնականում չէին զբաղվում դրանցով։ Երբ 2014-ին Ղրիմը և Սևաստոպոլը վերադարձան Ռուսաստանի կազմ, բազան վերադարձավ նաև ստորջրյա դիվերսիոն ուժերի և միջոցների կազմի մեջ։ Դելֆինների հետ աշխատանքները կրկին ակտիվացել են», - ասել է Մուհամեդովը։
Նա նաև ընդգծել է, որ հակադիվերսիոն աշխատանքի համար կարելի է ներգրավել միայն սևծովյան աֆալիններին՝ խոշոր դելֆիններին։ Նրանց երկարությունը 3,5 մետր է, քաշը՝ մոտ 300 կիլոգրամ, նրանք ավելի լավ են վարժվում և կարողանում են կատարել հակադիվերսիոն առաջադրանքները։