ԵՐԵՎԱՆ, 21 հոկտեմբերի - Sputnik. Ջերմուկի քաղաքապետ Վահագն Արսենյանը Sputnik Արմենիայի հետ զրույցում ներկայացրել է ադրբեջանական ագրեսիայից հետո առողջարանային քաղաքում իրավիճակը։
«Ջերմուկում բնակչության 85 տոկոսը հետ են վերադարձել իրենց տները, դպրոցներն ու մանկապարտեզները բնականոն աշխատանքին են անցել։ Բոլոր վնասված ենթակառուցվածքները վերականգնվել և վերականգնվում են»,–ասաց քաղաքապետը։
Պատկերն այլ է առողջարաններում։ Թեպետ բացվել են բոլոր հյուրանոցներն ու առողջարանները, սակայն ընդամենը 7-8 տոկոսն է զբաղեցված՝ նախկին 80 տոկոսի փոխաերն։
«Հանգստացողների մոտ անհանգստություն կա, բայց կոչ եմ անում բոլորին պաշտպանության նախարարության աշխատանքներին խառնվելու փոխարեն, գալ այստեղ` հանգստանալու։ Եթե չեն կարող կռվել, թող գան գոնե Ջերմուկում հանգստանան»։
Քաղաքապետը նաև հայտնեց, որ հաշվում են Ջերմուկ քաղաքի վնասները և պատրաստվում են դիմել կառավարությանը, որպեսզի փոխհատուցվեն հյուրանոցների սեպտեմբեր ամսվա կոմունալ վճարներն ու աշխատավարձերը։
Արսենյանը վստահեցնում է, որ մարդիկ իրենց բնականանոն կյանքով են ապրում և՛ Ջերմուկում, և՛ հարակից վայրերում, կրակոցներ չկան։
«Նոր եմ իջել դիրքերից, բայց ես ինձ չեմ վերապահում դիրքերից խոսել, թող դրանից խոսի ՊՆ-ն, ասում են դիրքի 90 տոկոսը վերցրել են, ո՞նց են վերցրել, եթե հայ զինվորը կանգնած պաշտպանում է։ Ինչո՞ւ են զինվորին այդպես վարկաբեկում»։
Հարցին` ինչպես ԳՇ պետն էր ասում՝ թշնամին 4 կմ–ի վրա՞ է, քաղաքապետը պատասխանեց. «Այդպիսի բան կա»։
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ սահմանվեց, որը պարբերաբար խախտում է ադրբեջանական կողմը։
Քննչական կոմիտեն սեպտեմբերի 30-ին հայտնեց, որ ադրբեջանական ագրեսիայի հետևանքով հայկական կողմն ունի 201 զոհ՝ 197 զինծառայող և 4 քաղաքացիական անձ, վիրավորվել է 293 զինծառայող ու 6 քաղաքացիական անձ, գերեվարվել է 20 զինծառայող:
Հոկտեմբերի 4-ին Ադրբեջանը Հայաստանին վերադարձրեց 17 գերիների։