ԵՐԵՎԱՆ, 21 հոկտեմբերի – Sputnik. Հայաստանի ու ԵԱՏՄ երկների միջև առևտրաշրջանառությունը այս տարվա 8 ամիսներին հասել է 2.8 մլրդ դոլարի և անցած տարվա նույն ժամանակահատվածի համեմատ ավելացել է 74 տոկոսով։ Հայտարարեց ՀՀ վարչապետ Նիկոլ Փաշինյանը Եվրասիական միջկառավարական խորհրդի նիստի լայն կազմով հանդիպման ժամանակ։
«Չնայած ծանր աշխարհաքաղաքական ու տնտեսական իրավիճակին ամբողջ աշխարհում, շարունակվում է խորանալ գործընկերային հարաբերությունները Եվրասիական միության անդամ երկրների միջև։ Գլոբալ մարտահրավերների պայմաններում այս տարի կարելի է վստահաբար արձանագրել փոխադարձ առևտրի դրական միտումները»,– ասել է Նիկոլ Փաշինյանը։
Նիկոլ Փաշինյանի խոսքով, Հայաստանից արտահանումը դեպի ԵԱՏՄ երկրներ աճել է երկու անգամ, իսկ ներմուծումը ավելացել է 58 տոկոսով։
Անդրադառնալով արդյունաբերությանը` Նիկոլ Փաշինյանը նշեց, որ այն միության գլխավոր ոլորտներից մեկն է։
«Արդյունաբերական կոոպերացիան հատկապես բարձր տեխնոլոգիաների ոլորտում կբարձրացնի ԵԱՏՄ երկրների մրցունակությունը»,– հայտարարեց նա։
Հայաստանի վարչապետը անդրադարձավ նաև ԵԱՏՄ երկների միջև էլեկտրոնային առևտրին ու նշեց, որ այս ոլորտը կարգավորման կարիք ունի։ Նա կարևորեց կարգավորող նորմերի շուտափույթ ընդունումը, որոնք պետք է հիմնված լինեն ապրանքները իրացնող երկրների հարկման սկզբունքների վրա։
Հիշեցնենք՝ Երևանում հոկտեմբերի 20–ին և 21–ին անցկացվում է Եվրասիական միջկառավարական խորհրդի նիստը։
Հայաստանի մայրաքաղաք են ժամանել Ռուսաստանի Դաշնության վարչապետ Միխայիլ Միշուստինը, Բելառուսի Հանրապետության վարչապետ Ռոման Գոլովչենկոն, Ղազախստանի Հանրապետության վարչապետ Ալիխան Սմաիլովը, Ղրղզստանի Հանրապետության վարչապետ Ակիլբեկ Ժապարովը և Եվրասիական տնտեսական հանձնաժողովի կոլեգիայի նախագահ Միխայիլ Մյասնիկովիչը:
Հոկտեմբերի 20-ին անցկացվել է Եվրասիական միջկառավարական խորհրդի նիստի նեղ կազմով հանդիպումը։