ԵՐԵՎԱՆ, 20 հոկտեմբերի — Sputnik. Լիզ Թրասը Twitter-ում հրապարակել է իր հրաժարականի հայտարարությունը, ի պատասխան օգտատերերը նրան խորհուրդ են տվել իր փոխարեն նշանակել Լարի կատվին։
Լարին 2011 թվականից ծառայում է որպես գլխավոր մկնորս բրիտանական վարչապետների նստավայրում ՝ Դաունինգ սթրիթ 10-ում: Նա ծառայության մեջ է եղել արդեն չորս վարչապետների՝ Դևիդ Քեմերոնի, Թերեզա Մեյի, Բորիս Ջոնսոնի ու Լիզ Թրասի օրոք։
«Լարին միակ բանն է, որ չի փոխվում Դաունինգ սթրիթում։ Չգիտեմ, թե ինչու նրանք ի սկզբանե չեն մտածել այդ մասին, նա, անշուշտ, ամենափորձառու թեկնածուն է, ես կքվեարկեի նրա օգտին», - գրում են օգտատերերը։
Բացի այդ, Twitter-ի օգտատերերը քննադատել են Լիզ Թրասին իր քաղաքականության համար, նշելով, որ նա գերազանցել է Մեծ Բրիտանիայի վարչապետի պաշտոնում գտնվելու ամենակարճ ժամկետի ռեկորդը:
«Բավականին մեծ ժառանգություն է։ Թագուհին մահացավ ձեզ հետ հանդիպելու հաջորդ օրը, և մի քանի շաբաթ անց դուք հրաժարական եք տալիս: Գրեք դա ձեր ռեզյումեում», - խորհուրդ է տվել մեկ այլ օգտատեր:
Հոկտեմբերի 20-ին Լիզ Թրասը հայտարարել է իր հրաժարականի մասին, նշելով, որ կմնա իր պաշտոնում, քանի դեռ իրավահաջորդը չի ընտրվել: Հրաժարականի մասին հայտարարության պահին Թրասը հասցրել է Մեծ Բրիտանիայի վարչապետի պաշտոնում ընդամենը 44 օր մնալ։ Ավելի վաղ ռեկորդը պատկանում էր 1827-ին պաշտոնավարած Ջորջ Կանինգին, որը 119 օր անց մահացել էր։
Մեծ Բրիտանիայի կառավարությունը՝ վարչապետ Թրասի գլխավորությամբ, քննադատության է ենթարկվել տնտեսության աջակցության նոր ծրագրի և այն մտավախությունների պատճառով, որ դրա իրականացման համար կառավարությունը կավելացնի պետական պարտքի չափը: Ծրագիրը խորհրդարանում ներկայացրել է ֆինանսների նախարարության նախկին ղեկավար Քվազի Քվարթինգը, և այն հարկերի մասշտաբային կրճատում էր ենթադրում։
Նրա հայտարարությունից հետո Մեծ Բրիտանիայի հնգամյա պետական պարտատոմսերի եկամտաբերությունն աճել է 2008 թվականից ի վեր առավելագույն՝ 4,6%-ի, ինչը պարտատոմսերի պահանջարկի նվազում է նշանակում: Այդ կապակցությամբ ֆունտի փոխարժեքը կտրուկ նվազել է ու սակարկությունների ընթացքում իջել է մինչև պատմական նվազագույնը՝ 1,054 դոլար մեկ ֆունտի դիմաց։