ԵՐԵՎԱՆ, 20 հոկտեմբերի – Sputnik․ ԱՄՆ-ն հեռու է մնում Իրանի հետ միջուկային գործարքին վերադառնալուց։ Հայտարարել է Ազգային անվտանգության խորհրդում ռազմավարական հաղորդակցության համակարգող Ջոն Կիրբին:
Կիրբին նշել է, որ Համատեղ համապարփակ գործողությունների ծրագրի վերադառնալու հեռանկարներն այնքան աղոտ են, որ այդ պատճառով Սպիտակ տան վարչակազմը ներկայումս չի էլ կենտրոնանում այդ հարցի վրա:
Ավելի վաղ ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ ԱՄՆ-ն փաստացի կորցրել է հետաքրքրությունը Համատեղ համապարփակ գործողությունների ծրագրի վերականգնման շուրջ բանակցությունների նկատմամբ և մտադիր է կենտրոնանալ Իրանում հակակառավարական գործունեությանը աջակցելու վրա:
2015 թվականին Մեծ Բրիտանիան, Գերմանիան, Չինաստանը, Ռուսաստանը, ԱՄՆ–ն, Ֆրանսիան և Իրանը միջուկային գործարք կնքեցին` Համատեղ համապարփակ գործողությունների ծրագիր, որը պատժամիջոցների չեղարկում էր ենթադրում Իրանի միջուկային ծրագրի սահմանափակման դիմաց։
2018 թվականի մայիսին ԱՄՆ այն ժամանակվա նախագահ Դոնալդ Թրամփը որոշում կայացրեց դուրս գալ Համատեղ համապարփակ գործողությունների ծրագրից և վերականգնել պատժամիջոցները Թեհրանի նկատմամբ։ Ի պատասխան Իրանը հայտարարեց համաձայնագրի շրջանակում փուլ առ փուլ իր պարտավորությունների կրճատման մասին` հրաժարվելով սահմանափակումներից միջուկային ուսումնասիրությունների, ցենտրիֆուգների և ուրանի հարստացման մակարդակի հարցում։