Ուկրաինայի հատուկ ծառայությունները կապ ունեն Ղրիմի կամրջի ահաբեկչության հետ. ՌԴ ՔԿ

ԵՐԵՎԱՆ, 19 հոկտեմբերի – Sputnik. Ուկրաինայի հատուկ ծառայությունների կողմից Ղրիմի կամրջի վրա ահաբեկչություն կազմակերպելու և ծրագրելու վարկածը հետաքննության ընթացքում հաստատվել է։ Տեղեկությունը ՌԻԱ Նովոստիին տված հարցազրույցում հայտնել է Ռուսաստանի քննչական կոմիտեի նախագահ Ալեքսանդր Բաստրիկինը:

Գերատեսչության ղեկավարը հիշեցրել է, որ հանցագործությանը մեղսակից են Ուկրաինայի, Ռուսաստանի, Հայաստանի և Վրաստանի քաղաքացիներ։ «Նրանց թվում այն մարդիկ են, որոնք տարբեր ապրանքների տարանցիկ ուղի են ապահովել ՌԴ տարածք՝ պայթուցիկով բեռնատարի պետական սահմանով հետագա տեղափոխման նպատակով», - ասել է Բաստրիկինը`ավելացնելով, որ 12-ից 8–ն արդեն ձերբակալվել են:

Բացի այդ, ՌԴ ՔԿ ղեկավարը հայտնել է, որ ձերբակալվածների հետ արդեն քննչական գործողություններ են իրականացրել։

Հիշեցնենք` հոկտեմբերի 8-ի առավոտյան Ղրիմի կամրջի վրա բեռնատար էր պայթել, ինչի հետևանքով երկաթգծի շարժակազմի վառելիքի 8 ցիստեռն բռնկվել էր։ Կամրջի երթևեկելի մասը մասնակի փլուզվել էր, պայթյունի հետևանքով երեք մարդ է մահացել։ Հակաահաբեկչական ազգային կոմիտեն նշել էր, որ ահաբեկչության պատվիրատուն և կատարողը Ուկրաինայի հատուկ ծառայություններն են։

Ռուսաստանի ԱԴԾ-ն պարզել է, որ բեռնատարը, որի մեջ ենթադրաբար եղել է պայթուցիկը, Օդեսայից մեկնել է Բուլղարիա, Վրաստան, Հայաստան, ապա Վրաստանի տարածքով գնացել Ռուսաստան։

Բեռնատարում պայթուցիկը թաքցված է եղել պոլիէթիլենային թաղանթով գլանափաթեթների մեջ։

Սեպտեմբերի 27-ին` ժամը 14:53-ին, այդ ավտոմեքենան մուտք է գործել ՀՀ տարածք։ Բեռնատարի վարորդը եղել է Հայաստանի ու Վրաստանի քաղաքացի Արթուր Թերջանյանը։

ԱԴԾ-ի տվյալներով` Հայաստանում սեպտեմբերի 29-ից հոկտեմբերի 3-ը բեռն ուղեկցող փաստաթղթերը վերաձևակերպվել են ԵԱՏՄ կանոնների համաձայն, և բեռն ուղարկող է դարձել արդեն «Գու Ար Ջի գրուպ» ՍՊԸ–ն (Հայաստան, ք. Ալավերդի), իսկ ստացող` «Լիդեր» ՍՊԸ–ն (ք. Մոսկվա)։

Հանցագործության նախապատրաստմանը մասնակցելու համար քրեական գործի շրջանակում այս պահին կալանավորված են ՌԴ 5, Ուկրաինայի 2 և Հայաստանի 1 քաղաքացի։