ԵՐԵՎԱՆ, 19 հոկտեմբերի - Sputnik. 2022 թվականի հունվար-սեպտեմբեր ամիսներին կատարված խախտումների և քրեական հանցագործությունների պատճառով պետությանը պատճառվել է 29 մլրդ 146 մլն 931 հազար 040 ՀՀ դրամ վնաս։ Տեղեկությունը հայտնում է ԱԱԾ մամուլի ծառայությունը։
Նշվում է, որ հաշվետու ժամանակահատվածում նախաքննության փուլում վերականգնվել է պետությանը պատճառած վնասից 14 մլրդ 351 մլն 883 հազար 303 ՀՀ դրամը։
«ՀՀ ԱԱԾ քննչական դեպարտամենտում նախաձեռնված և քննված քրեական վարույթներով, ըստ նախնական գնահատման, ընդհանուր վնասի չափը կազմել է 31 մլրդ 490 մլն 134 հազար 199 ՀՀ դրամ։ Բացի պետությանը հասցված վնասից, իրավաբանական անձանցը կազմել է 384 մլն 639 հազար 069 ՀՀ դրամ, իսկ ֆիզիկական անձանցը` 1 մլրդ 958 մլն 564 հազար 090 ՀՀ դրամ: Ընդհանուր առմամբ, իրավաբանական անձանց պատճառված վնասից վերականգնվել է 270 մլն 571 հազար 217 ՀՀ դրամը»,- ասված է հաղորդագրությունում:
ԱԱԾ-ն ՀՀ պետական իրավասու տարբեր մարմինների փոխանցել է 1596 նյութ, որոնց հիման վրա նախաձեռնվել է 334 քրեական վարույթ։
Տնտեսական ոլորտում իրականացված խախտումների վերաբերյալ ՀՀ պետական իրավասու մարմիններ է ուղարկվել 194 նյութ։ Դրանցից 92-ը՝ պաշտոնական դիրքի չարաշահումների և յուրացումների, 72-ը՝ տնտեսական գործունեության զանազան խախտումների, այդ թվում՝ մաքսանենգ կամ կեղծ ապրանքագրերով ներմուծումների, ինչպես նաև հարկերից և տուրքերից խուսափումների, 23-ը՝ աշխատավարձի տրամադրում իրականում չաշխատող անձի, 7-ը՝ փոխհատուցման անօրինական տրամադրումների մասին նյութեր են»,- ասված է հաղորդագրությունում։
Թմրանյութերի և հոգեմետ նյութերի անօրինական շրջանառության ոլորտում իրականացված խախտումների վերաբերյալ էլ 55 նյութ է ուղարկվել։
Ընթացիկ տարվա 9 ամսում ՀՀ ԱԱԾ քննչական դեպարտամենտի քննիչների վարույթում եղել է 694 քրեական վարույթ, 220 քրեական վարույթ ստացվել է այլ մարմիններից, վերսկսվել է 48 քրեական վարույթ, իսկ թվով 68 քրեական վարույթ փոխանցվել է 2021 թվականից:
Քրեական վարույթներից դատարան է ուղարկվել 60 գործ` 88 անձի նկատմամբ, կարճվել է 108-ը, կասեցվել` 54-ը։