ԵՐԵՎԱՆ, 19 հոկտեմբերի – Sputnik. Ջերմուկ առողջարանային քաղաքում վիճակն անհանգստացնող է։ Սեպտեմբերի 13-ի գիշերը առողջարաններում ոչ մի ազատ տեղ չի եղել, հիմա այդպես չէ։ Լրագրողների հետ ճեպազրույցում հայտարարել է Հայաստանի Էկոնոմիկայի նախարար Վահան Քերոբյանը։
Էկոնոմիկայի նախարարը վստահեցրել է, որ անձամբ այցելել է Ջերմուկ ու Վարդենիս` ծանոթանալու իրավիճակին։
«Ջերմուկի հյուրանոցները սկսել են աշխատել։ Կյանքն ակտիվանում է՝ ինչպես այնտեղ, այնպես էլ մյուս բնակավայրերում։ Ինչ վերաբերում է տնտեսական վնասին, ապա դա ոչ թե հենց այդ բնակավայրերում է տեղի ունեցել, քանի որ հրետակոծված բնակավայրերը Հայաստանի տնտեսության մեջ մեծ մասնակցություն չունեն, այլ ընդհանուր բիզնես միջավայրում է եղել»,– նշել է նախարարը։
Նախարարը նաև հիշեցրել է, որ կառավարությունը գումար է հատկացրել մարզպետարաններին, որպեսզի բնակավայրերը արագ վերականգնվեն։
«Մենք էլ ծրագրեր ենք մտածում զբոսաշրջային միջավայրը ակտիվացնելու համար։ Բայց դա դեռ խոստում չէ, միգուցե մենք տեսնենք, որ առանց դրա էլ է ակտիվանում, և ոչ մի ծրագիր էլ չանենք»,- ասել է Քերոբյանը։
Անդրադառնալով Ջերմուկի ճոպանուղուն նա ասել է, որ այն դեռ չի գործում, որովհետև պահեստամասեր ներմուծելու և վերանորոգելու խնդիր կա։
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ սահմանվեց, որը պարբերաբար խախտում է ադրբեջանական կողմը։
Քննչական կոմիտեն սեպտեմբերի 30-ին հայտնեց, որ ադրբեջանական ագրեսիայի հետևանքով հայկական կողմն ունի 201 զոհ՝ 197 զինծառայող և 4 քաղաքացիական անձ, վիրավորվել է 293 զինծառայող ու 6 քաղաքացիական անձ, գերեվարվել է 20 զինծառայող:
Հոկտեմբերի 4-ին Ադրբեջանը Հայաստանին վերադարձրեց 17 գերիների։