ԵՐԵՎԱՆ, 19 հոկտեմբերի – Sputnik. Երևանում անցկացվելու է «Ռուսական կինոյի օրեր» փառատոնը՝ «Russian Film Festival» ապրանքանիշի ներքո։ Կինոդիտումները լինելու են հոկտեմբերի 21-ից 23-ը Երևանի «Մոսկվա» կինոթատրոնում։ Տեղեկությունը հայտնում է «ՌՈՍԿԻՆՈ»-ն, որն էլ կազմակերպում է միջոցառումը՝ ՌԴ մշակույթի նախարարության աջակցությամբ։
«Հայաստանը «Ռուսական կինոյի օրեր» 2022 թվականի օրացույցում դարձավ 9-րդ երկիրը, ուր տեղի հանդիսատեսը հնարավորություն կունենա ծանոթանալու ռուսական նոր ֆիլմերին»,–ասված է հաղորդագրության մեջ։
Այս տարի «Russian Film Festival» ապրանքանիշի ներքո արդեն միջոցառումներ են անցկացվել Բրազիլիայում, Ուրուգվայում, Հորդանանում, Չինաստանում, Ղազախստանում, Բելառուսում, Ուզբեկստանում և այլուր։ Նախագծի մեկնարկից՝ 2020 թվականից ի վեր, ավելի քան 6,5 միլիոն մարդ աշխարհի 26 երկրներում դարձել է ռուսական կինոփառատոնի հանդիսատես։
«ՌՈՍԿԻՆՈ»-ի գլխավոր տնօրեն Իննա Շալիտոն նշել է, որ «Russian Film Festival» ապրանքանիշի ներքո Հայաստանում կազմակերպվում է երկրորդ միջոցառումը։
«Այս տարի օգոստոսին «IVI» առցանց կինոհարթակում անցկացվեցին ռուսական ֆիլմերի առցանց ցուցադրություններ։ Օֆլայն միջոցառման շրջանակում ընդգրկված է հինգ ֆիլմ՝ գեղարվեստական, բազմասերիանոց և մանկական անիմացիոն: Մենք նաև ձգտում ենք ակտիվացնել բիզնես երկխոսությունը Ռուսաստանի և Հայաստանի կինոարտադրության ոլորտների միջև մշակութային նման միջոցառումների կազմակերպման միջոցով»,- ասել է Շալիտոն:
Նշենք, որ փառատոնի շրջանակում «Մոսկվա» կինոթատրոնի էկրանին անվճար կցուցադրվեն «Կրակ», «Նիկա», «Անծանոթի դիմանկարը» ֆիլմերը, «Քնքշություն» բազմասերիանոց ֆիլմը և «Բուկա, իմ սիրելի հրեշը» լիամետրաժ մուլտֆիլմը:
«Նիկա», «Քնքշություն», «Կրակ» և «Անծանոթի դիմանկարը» ֆիլմերի ցուցադրություններից հետո կազմակերպվելու է նաև ֆիլմերի քննարկում կինոգետ Դիանա Մարտիրոսյանի հետ։
Նշենք, որ «Ռուսական կինոյի օրերը» Russian Film Festival (RFF) ապրանքանիշի ներքո արտասահմանում ֆիլմերի օրեր են, որ անցկացվում են 2020 թվականից։ RFF-ի հիմնական նպատակն է օտարերկրյա հեռուստադիտողին ծանոթացնել ժամանակակից ռուսական բովանդակության բազմազանությանը: