ԵՐԵՎԱՆ, 19 հոկտեմբերի – Sputnik. Կառավարությունում մշակում են պարենային անվտանգության ռազմավարություն, որը պետք է ուղղված լինի ոչ միայն անհրաժեշտ քանակի սննդամթերքով Հայաստանին ապահովելուն, այլ նաև մարդկանց ճիշտ սնվելուն։ Լրագրողների հետ ճեպազրույցում հայտարարել է Հայաստանի Էկոնոմիկայի նախարար Վահան Քերոբյանը հավելելով, որ պարենային անվտանգությունը Հայաստանի անվտանգային կարևոր բաղադրիչներից մեկն է։
«Օրինակ՝ մինչև 2 տարեկան երեխաների պարագայում մենք տեսնում ենք, որ խնդիրը ոչ թե թերսնվելն է, այլ նաև սխալ սնվելը, որի հետևանքով երեխաների ավելի քան 40 տոկոսը ունեն թերսնվածություն։ Սա ոչ միայն քիչ սնվելուց է, այլ նաև սխալ սնվելուց»,– նշել է նախարարը։
Նախարարը վստահեցրեց, որ թերսնված երեխաները շատ դեպքերում կարող են լինել նաև բարեկեցիկ ընտանիքներից. «Պարզապես խնդիրը այն է, որ մարդիկ չգիտեն, թե ինչպես ճիշտ կերակրել երեխային»։
Քերոբյանի պնդմամբ, պետք է հատուկ սննդակարգ կազմվի երեխաների համար։ Հենց այդ պատճառով էլ պարենային ռազմավարություն է մշակվում։ Մինչև տարեվերջ այն պատրաստ կլինի, ճանապարհային քարտեզով նշված կլինի, թե ինչը ու երբ պետք է ուտել։