Հայաստանը Հնդկաստանին ռեակտիվ համազարկային կրակի համակարգերի մատակարարման պատվեր է տվել

ԵՐԵՎԱՆ, 18 հոկտեմբերի – Sputnik. Հայաստանը հնդկական «Solar group» ռազմաարդյունաբերական ընկերությանը «Pinaka» ռեակտիվ համազարկային կրակի համակարգերի մատակարարման պատվեր է տվել։ Այս մասին հայտնել է ընկերության նախագահ Սաթյանարայան Նուվալը, գրում է ՌԻԱ Նովստին։

Նրա խոսքով` հնդկական կողմը այդ պատվերը պետք է կատարի երկու տարվա ընթացքում։

Նուվալը հավելել է, որ «Pinaka» ռեակտիվ համազարկային կրակի համակարգերի նկատմամբ հետաքրքրություն են ցուցաբերել նաև Նիգերիան և Ինդոնեզիան։

Հիշեցնենք, որ սեպտեմբերի վերջին The Economic Times պարբերականը գրել էր, որ Հնդկաստանը Հայաստանին շուրջ 250 մլն ԱՄՆ դոլար արժողությամբ զենք և զինամթերքի խոշոր խմբաքանակ կմատակարարի։