Երևանում նոր հուշատախտակներ կտեղադրվեն

ԵՐԵՎԱՆ, 18 հոկտեմբերի - Sputnik. Երևանում կտեղադրվեն նոր հուշատախտակներ։ Որոշումը ընդունվեց մայրաքաղաքի ավագանու այսօրվա նիստում։

Որոշմանը կողմ է քվեարկել ավագանու 49, դեմ՝ 0, ձեռնպահ՝ 1 անդամ։

Տերյան 19 հասցեում կտեղադրվի ՀՀ ժողովրդական արտիստ, դերասան Կարեն Ջանիբեկյանի հուշատախտակը, Մոսկովյան 31 հասցեում կլինի ՀՀ ԳԱԱ ակադեմիկոս, ՀՀ գիտության վաստակավոր գործիչ, տեխնիկական գիտությունների դոկտոր, պրոֆեսոր, Երևանի պատվավոր քաղաքացի Սերգեյ Համբարձումյանի հուշատախտակը, Բաղրամյան 30 հասցեում կփակցվի ՀԽՍՀ վաստակավոր ճարտարապետ Լևոն Հովհաննիսյանի, Մաշտոցի 17 հասցեում՝ բանաստեղծ Եղիշե Չարենցի հուշատախտակը։ Հրաբխագիտության լաբորատորիայի ավագ գիտաշխատող, երկրաբանահանքաբանական գիտությունների թեկնածու Սերգեյ Կարապետյանի հուշատախտակը կլինի Սայաթ-Նովայի պողոտա հ.25 հասցեում:

Քաղաքապետարանն առաջարկում է հուշատախտակները ճանաչել քաղաքի սեփականություն, որպեսզի իշխանությունները հոգ տանեն դրանց մասին։