ԵՐԵՎԱՆ, 18 հոկտեմբերի - Sputnik. Փաստաբան Էրիկ Ալեքսանյանի կալանավորելու ոչ մի հիմք չկա։ Այս մասին լրագրողներին հայտնեց «Հայաստան» դաշինքի պատգամավոր Արամ Վարդևանյանը։
Պատգամավորն ընդգծել է, որ չի կարող միանշանակ օբյեկտիվ լինել, քանի որ Էրիկ Ալեքսանյանի հետ բարեկամական հարաբերություններ ունի, սակայն անթույլատրելի է համարել «կալանավորման ֆետիշացումը»:
«Ես չեմ հասկանում այս ֆետիշացումը, և այդ մասին խոսել եմ, օրինակ, դատավոր Բորիս Բաշխյանի գործի ժամանակ։ Իրավիճակն այն ժամանակ էլ աբսուրդ էր։ Ոչ քննիչները, ոչ էլ դատախազները պետք է որոշում կայացնեն դատական ակտի իրավաչափության մասին։ Իսկ հիմա այդ պրակտիկան մտել է առօրյա կյանք, և իրավիճակը զարգանում է նույն սցենարով», - ասաց Վարդևանյանը։
Նրա խոսքով, հիմքեր չկան ենթադրելու, որ Ալեքսանյանը կխոչընդոտի քննությանը, հանցագործություն կկատարի կամ կփախչի, ուստի կալանքը որպես խափանման միջոց ոչնչով հիմնավորված չէ:
Վարդևանյանը նաև քննադատել է քննչական մարմինների փաստարկները։
«Ալեքսանյանին մեղադրում են գրավի միջնորդություն ներկայացնելու մեջ, բայց դա փաստաբանի նորմալ գործողություն է։ Ինչ է՝ նա չպե՞տք է միջնորդություններ ներկայացնի։ Դա առնվազն կասկած կառաջացներ փաստաբանի կոմպետենտության և բարեխղճության վերաբերյալ», - նշեց Վարդևանյանը։
Ավելի վաղ հայտնի էր դարձել, որ դատավոր Արուսյակ Ալեքսանյանին մեղադրանք է առաջադրվել պաշտոնեական լիազորությունները չարաշահելու, իսկ փաստաբան Էրիկ Ալեքսանյանին՝ նրան աջակցելու համար: ԶԼՄ-ների տվյալներով ՝ նրանք մեղադրվում են «օրենքով գողի» գործով կաշառք վերցնելու մեջ։