ԵՐԵՎԱՆ, 18 հոկտեմբերի – Sputnik. Արցախի բնակչության անվտանգությունը պայմանավորված է ռուս խաղաղապահների ներկայությամբ։ Հայտարարեց ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանը ԱՄՆ կոնգրեսականների հետ ասուլիսի ժամանակ։
Միևնույն ժամանակ Էդուարդ Աղաջանյանը կարևորեց նաև միջազգային հանրության ներգրավվածությունն այս հարցում։
«Այդ ներգրավվածությունը պետք է լինի հնարավորինս խորը և համապարփակ։ Սա է հարցի լուծման հիմնական, կարևորագույն և իրատեսական ճանապարհը»,– ասաց նա։
Հիշեցնենք` 2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: