ԵՐԵՎԱՆ, 17 հոկտեմբերի – Sputnik. Հակակոռուպցիոն կոմիտեում քննվող քրեական գործով բացահայտվել է, որ ՀՀ կադաստրի կոմիտեի նախկին պաշտոնյաներ Գ. Մ.-ն և Դ. Մ.-ն, իրենց մտերիմ անձանց հետ նախնական համաձայնությամբ, արխիվի բաժնի պետի պաշտոնակատար Հ. Ա.-ի և այլ պաշտոնատար անձանց հետ հափշտակել են Երևան քաղաքի Նորք-Մարաշ, Աջափնյակ և Կենտրոն վարչական շրջաններում գտնվող պետական և համայնքային սեփականություն հանդիսացող, ընդհանուր շուրջ 5,6 մլրդ ՀՀ դրամ շուկայական արժեքով 11 հողատարածքներ:
Բացի այդ Հ. Ա.-ն Գ. Մ.-ից 2 մլն ՀՀ դրամ կաշառք է ստացել Երևան քաղաքի Աջափնյակ թաղամասում գտնվող 209 մլն ՀՀ դրամ շուկայական արժեքով հողամասը կադաստրի էլեկտրոնային համակարգում կեղծելու ու այն որպես Ծ. Գ.-ի սեփականություն գրանցելու համար։
Նախաքննական մարմինը նաև հայտնում է, որ Հ. Ա.-ն, տեղյակ լինելով Գ. Մ.-ի անմիջական մասնակցությամբ առանձնապես խոշոր չափերի հողամասերի հափշտակության ու կադաստրային գործերում առկա կեղծ փաստաթղթերի գոյության մասին, 2021 թվականի ընթացքում կադաստրի էլեկտրոնային համակարգում որպես տարբեր հողամասերի սեփականատերեր է մուտքագրել տարբեր անձանց տվյալներ: Ընդհանուր առմամբ պետության հաշվեկշռից ապօրինի կերպով դուրս է բերվել 2 մլրդ 343 մլն դրամ արժեքով 5 հողամաս։
Բացահայտման արդյունքում Հ. Ա.-ին մեղադրանք է ներկայացվել ՀՀ քրեական օրենսգրքի 308-րդ հոդվածի 2-րդ մասով (պաշտոնեական դիրքի չարաշահում): Նրա նկատմամբ որպես խափանման միջոց է ընտրվել կալանավորումը:
Քրեական վարույթի նախաքննության ընթացքում մեղադրանք է ներկայացվել ընդհանուր 11 անձի: Նախաքննությունը շարունակվում է: Ձեռնարկվում են անհրաժեշտ քննչական գործողություններ և օպերատիվ-հետախուզական միջոցառումներ` համայնքային և պետական սեփականություն հանդիսացող հողատարածքների հափշտակության հանցավոր սխեմայում ընդգրկված բոլոր անձանց, այդ թվում` ՀՀ կադաստրի կոմիտեում և Երևանի քաղաքապետարանում պաշտոններ զբաղեցրած, առերևույթ պաշտոնեական դիրքը չարաշահած և պաշտոնեական կեղծիք կատարած անձանց ինքնությունները պարզելու ուղղությամբ: