ԵՐԵՎԱՆ, 17 հոկտեմբերի – Sputnik. Հայաստանում նկատվում է սուր շնչառական վարակների սեզոնային թեթև աճ։ Կանխատեսվում է, որ նոյեմբեր–դեկտեմբեր ամիսներին կլինի ավելի մեծ աճ` կապված եղանակային պայմանների փոփոխությունների հետ։ Այս մասին հայտարարել է առողջապահության նախարար Անահիտ Ավանեսյանը։
Նախարարնայսօր այցելել էր Երևան քաղաքի պոլիկլինիկաներից մեկը` գրիպի դեմ պատվաստվելու համար։ Նա կոչ է անում քաղաքացիներին հետևել իր օրինակին ու նախապես պատվաստվել գրիպի դեմ։
«Թե ինչպիսին կլինի այս տարի վիրուսի ակտիվությունը, չենք կարող ասել, բայց ամեն տարի պաշտպանված լինել գրիպի վտանգավոր 4 շտամներից, կարծում ենք` շատ կարևոր է։ Առաջին հերթին պետք է ուշադիր լինեն ռիսկային խմբերը` մինչև 12 տարեկան երեխաները, խրոնիկ հիվանդները, 65+ տարիքի քաղաքացիները և բուժաշխատողները»,– նշել է նախարարը։
Անահիտ Ավանեսյանը հիշեցրեց` պատվաստվել կարելի է ցանկացած պոլիկլինիկայում` անկախ բնակության վայրից։
«Ունենք նաև շարժական կետ Հանրապետության հրապարակում։ Կարող եք մոտնենալ, ընդամենը 10 րոպե է խլելու ձեզանից»,– նշեց նա։
Իմունականխարգելման ազգային ծրագրի ղեկավար Գայանե Սահակյանն իր հերթին նշեց, որ այս տարի Հայաստան է ներկրվել պատվաստանյութի 170 հազար դեղաչափ, որից 150 հազարը (SANOFI PASTEUR) վաքսիգրիպ-տետրա գրիպի քառավալենտ պատվաստանյութն է։
«Մինչև վերջին դեղաչափն էլ սպառվել է։ Օգտվում են նաև ոչ ռիսկային խմբում գտնվող քաղաքացիները։ Տարիներ շարունակ մենք պատվաստումներ ենք իրականացրել սեզնային գրիպի դեմ, արդյունավետությունը միշտ նկատել ենք, մարդիկ իրենք էլ են նկատել,դրա համար էլ պատվաստանյութի պահանջարկը գնալով ավելացել է»,– նշեց Սահակյանը։
Նա հիշեցրեց, որ կորոնավիրուսի համաճարաային իրավիճակը ժամանակ առ ժամանակ սրվում է, ու եթե գրիպի դեպքերն էլ զուգակցվեն դրա հետ, ծանր դեպքերն ավելի շատ կլինեն։