ԵՐԵՎԱՆ, 15 հոկտեմբերի – Sputnik. Ռուսաստանը փորձում է «Starlink» արբանյակային ինտերնետի համակարգը «սպանել» Ուկրաինայում, այն կարող է դադարել գործել, անկախ դրա պաշտպանության մեջ ներդրած ռեսուրսների։ Այս հայտարարությունն արել է ամերիկացի գործարար Իլոն Մասկը։
««Starlink»–ը միակ կապի միջոցն է, որը դեռ աշխատում է ռազմաճակատում, մնացածը մեռած են։ Դրա պաշտպանության համար «SpaceX»–ը հսկայական ռեսուրսներ է ուղղել։ Նույնիսկ այդ դեպքում «Starlink»–ը կարող է մեռնել»,–գրել է Մասկը թվիթերյան էջում։
Հիշեցնենք` Մասկը երեկ հաստատել էր, որ «SpaceX»–ն այլևս չի կարող Ուկրաինայում վճարել «Starlink»–ի սպասարկման համար։ Այսօրվա դրությամբ Ուկրաինային «Starlink»–ի շուրջ 20 հազար տերմինալ է փոխանցվել։ Ըստ Մասկի` դրա հետ կապված գործողությունների համար «SpaceX»–ը 80 մլն դոլար է վճարել, իսկ տարեվերջին այդ ծախսերը կգերազանցեն 100 մլն դոլարը։
Պենտագոնը հայտնել է, որ Ուկրաինայում «Starlink» արբանյակային ինտերնետի շուրջ բանակցում է Մասկի ընկերության հետ և անհրաժեշտ է համարում, որ տեղի զինվորականները շարունակեն ունենալ տիեզերական կապի միջոցներ։ ԱՄՆ ռազմական գերատեսչության հայտարարության համաձայն` Ուկրաինայի զորքերին արբանյակային ինտերնետ կարող է մատակարարել ոչ միայն Մասկի ընկերությունը։
«Starlink»–ը նոր սերնդի արբանյակային ցանց է, որը նախատեսված է ամբողջ աշխարհով լայնաշերտ ինտերնետ հասանելիություն ապահովելու համար։ Մասկի «SpaceX» ընկերությունը ուղեծիր է ուղարկել ավելի քան 2.3 հազար «Starlink» արբանյակներ։