ԵՐԵՎԱՆ, 15 հոկտեմբերի – Sputnik. Հայաստանի արտգործնախարար Արարատ Միրզոյանը հանդիպում է ունեցել Արցախի նախագահ Արայիկ Հարությունյանի գլխավորած պատվիրակության հետ: Տեղեկությունը հայտնում է ԱԳՆ մամուլի ծառայությունը։
Պատվիրակության կազմում եղել են Արցախի ԱԺ նախագահ Արթուր Թովմասյանը, Արցախի ԱԳ նախարար Դավիթ Բաբայանը և պաշտոնատար այլ անձիք:
Զրուցակիցները մտքեր են փոխանակել տարածաշրջանում ստեղծված անվտանգային իրավիճակի վերաբերյալ: Միրզոյանը մանրամասնորեն ներկայացրել է Ադրբեջանի հետ հարաբերությունների կարգավորման շուրջ ընթացող քննարկումների զարգացումները և Լեռնային Ղարաբաղի հիմնախնդրի կարգավորման հեռանկարները:
Հիշեցնենք` հոկտեմբերի 12-ին Արցախի նախագահի հետ հանդիպել էր նաև ՀՀ վարչապետ Նիկոլ Փաշինյանը։ Ավելի ուշ պատվիրակությանը հյուրընկալել էին ՀՀ ԱԺ նախագահ Ալեն Սիմոնյանն ու ՀՀ նախագահ Վահագն Խաչատուրյանը։