ԵՐԵՎԱՆ, 15 հոկտեմբերի – Sputnik. Երևանում կանգնեցվել է Երևանի բերդը ազատագրած գեներալ Իվան Պասկևիչի հուշարձանը։ Տեղեկությունը հայտնում է Երևանում Ռուսական տունը։
Ինչպես նշել է Երևանում Ռուսական տան (Ռոսսոտրուդնիչեստվո) ղեկավար Վադիմ Ֆեֆիլովը, հուշարձանի հեղինակը քանդակագործ Արմեն Սամվելյանն է։
Երևանում կանգնեցվել է Երևանի բերդն ազատագրած գեներալ Պասկևիչի հուշարձանը
© Photo : Русский Дом в Армении
«Վերջապես Երևանի բերդի տարածքում հավերժացվեց ռուս ականավոր զորավար և դիվանագետ Իվան Պասկևիչի հիշատակը ։ Այժմ Հաղթանակի կամրջով անցնող ճանապարհի կողմից բերդի պատի վրա դրված է նրա փոքրիկ հարթաքանդակը, իսկ ներսում՝ մի հոյակապ պղնձե հուշարձան», - նշել է Ֆեֆիլովը։
Նրա խոսքով՝ սկզբում ցանկացել են հուշատախտակի վրա մանրամասն ներկայացնել պատմությունը. «1827-1828 թվականներին Արևելյան Հայաստանը (և Էրիվան ամրոցը) ազատագրած ռուսական բանակի կովկասյան կորպուսի հրամանատար»։
«Բայց ի վերջո որոշեցինք՝ թող անցորդներն ու զբոսաշրջիկները համացանցում փնտրեն, թե ինչու է այդքան հզոր բրոնզե հուշարձանի վրա գրված ամենապարզ մակագրությունը. «Իվան Պասկևիչ։ Ռուս գեներալ։ Շնորհակալություն»։
Հիշեցնենք, որ 1827 թվականի սեպտեմբերի 13-ին ռուսական բանակը` գեներալ Իվան Պասկևիչի գլխավորությամբ, ազատագրեց Երևանի բերդը։ Պասկևիչին Էրիվանի կոմսի տիտղոս և Սուրբ Գեորգիի շքանշան շնորհվեց։