ԵՐԵՎԱՆ, 14 հոկտեմբերի — Sputnik. Թուրքիայի նախագահ Ռեջեփ Թայիփ Էրդողանը հայտարարել է, որ Հայաստանի տարածքով միջանցք բացելու նախագծի իրականացման հետ կապված որևէ խնդիր չի տեսնում: Տեղեկությունը հայտնում է ՌԻԱ Նովոստին։
Էրդողանը նշել է, որ Պրահայում նեղ մասնագիտական հանդիպում է տեղի ունեցել ՀՀ վարչապետ Նիկոլ Փաշինյանի հետ:
«Դրանից հետո, իհարկե, մենք պատվիրակությունների մակարդակով հանդիպում ունեցանք ու քննարկեցինք այդ հարցերը։ Բայց ես Զանգեզուրի միջանցքի հետ կապված ոչ մի խնդիր չեմ տեսնում», - Աստանայից վերադառնալիս ինքնաթիռում լրագրողներին ասել է Թուրքիայի նախագահը։
Հիշեցնենք, որ Բաքուն պարբերաբար հայտարարում է Հայաստանի Հանրապետության հարավային շրջաններում, այսպես կոչված, «Զանգեզուրի միջանցք» բացելու մտադրության մասին։ Պաշտոնական Երևանը մերժում է արտատարածքային միջանցքի գաղափարը, սակայն պատրաստ է բացել ճանապարհները, որոնք կգտնվեն այն երկրների իրավասության ներքո, որոնց տարածքով դրանք անցնում են: