ԵՐԵՎԱՆ, 14 հոկտեմբերի – Sputnik. ՀՀ վարչապետ Նիկոլ Փաշինյանը Ղազախստանի մայրաքաղաքում՝ ԱՊՀ պետությունների ղեկավարների խորհրդի հերթական նիստի իր ելույթում անդրադարձել է ԱՊՀ–ին ՀԱՊԿ-ում դիտորդի կարգավիճակ տալու հարցին։
Փաշինյանը ԱՊՀ անդամ իր գործընկերներին կոչ է արել որոշում կայացնելուց առաջ կողմորոշվել մի շարք կարևոր հարցերում:
«Արդյո՞ք ՀԱՊԿ-ը ճանաչում է 1991 թ.-ին հաստատված ԱՊՀ երկրների պետական սահմանները` որպես ԱՊՀ հիմնարար փաստաթղթեր։ Սա կարևոր հարց է, քանի որ խոսքը ՀԱՊԿ-ի պատասխանատվության գոտու և, թույլ տվեք ասել, հենց կազմակերպության ֆունկցիոնալության մասին է։ Եթե հիմնվենք մեկնաբանությունների վրա, ըստ որոնց՝ ԱՊՀ երկրների միջև սահմաններ գոյություն չունեն, քանի որ այդ սահմանները սահմանազատված չեն, դա նշանակում է, որ ՀԱՊԿ-ի պատասխանատվության գոտին որոշված չէ, այսինքն՝ այն գոյություն չունի։ Իսկ դա լղոզում է ՀԱՊԿ-ի ֆունկցիոնալությունը»,– հայտարարել է վարչապետը։
Նա կարևորել է նաև հստակ պատասխան տալն այն հարցին, թե արդյոք ԱՊՀ անդամ երկրները ճանաչում են միմյանց միջև 1991 թ.-ին հաստատված սահմանները` որպես ԱՊՀ հիմնարար փաստաթղթեր, ինչը ևս կարևոր է ԱՊՀ տարածքում կայունության և անվտանգության համար։
«Առանց այս հարցերի հստակ պարզաբանման ես վաղաժամ եմ համարում ԱՊՀ-ի՝ ՀԱՊԿ-ում դիտորդի կարգավիճակ ստանալու դիմումի վերաբերյալ որոշման կայացումը։ Այս հարցերը մեզ համար առանձնահատուկ սրություն են ձեռք բերել Հայաստանի դեմ Ադրբեջանի վերջին ռազմական ագրեսիայի պատճառով»,– ասել է Փաշինյանը։
Հիշեցնենք` այսօր Աստանայում Ռուսաստանի նախագահ Վլադիմիր Պուտինը կողմ էր արտահայտվել ԱՊՀ–ին ՀԱՊԿ–ում դիտորդի կարգավիճակ տալու գաղափարին, քանի որ դա, նրա համոզմամբ, լրացուցիչ մեխանիզմներ կստեղծի անվտանգության խնդիրների լուծման համար։
Պուտինը, Փաշինյանին դիմելով, ասել էր նաև, որ եթե որոշ գործընկերներ որոշակի մտահոգություններ ունեն այդ հարցի վրաբերյալ, ապա դրանց վերաբերյալ հետագայում պետք է աշխատանք տարվի։
Հիշեցնենք, որ ի տարբերություն ՀԱՊԿ–ի, ԱՊՀ–ին անդամակցում է նաև Ադրբեջանը։
ՀԱՊԿ անդամներն են Հայաստանը, Ռուսաստանը, Բելառուսը, Ղազախստանը, Ղրղզստանը և Տաջիկստանը։ ԱՊՀ–ում, բացի նշվածներից, ընդգրկված են նաև Ադրբեջանը, Մոլդովան, Ուզբեկստանը։