ԵՐԵՎԱՆ, 13 հոկտեմբերի – Sputnik. ԵԽԽՎ Հայաստանի հարցով համազեկուցողները հանդես են եկել հայտարարությամբ, որով Ադրբեջանին կոչ են արել անհապաղ դուրս բերել ուժերը Հայաստանի օկուպացված տարածքներից և ազատ արձակել բոլոր ռազմագերիներին։ Այս մասին իր ֆեյսբուքյան էջում գրել է ՀՀ ԱԺ նախագահի տեղակալ, ԵԽԽՎ-ում ՀՀ ԱԺ պատվիրակության ղեկավար Ռուբեն Ռուբինյանը։
Նշված է նաև, որ համազեկուցողները մտահոգություն են հայտնել Ադրբեջանի զինված ուժերի կողմից իրականացված ռազմական հանցագործությունների մասին ստացվող տեղեկությունների վերաբերյալ։
«Այն ժամանակ, երբ երկու կողմերն էլ միմյանց մեղադրում են ռազմական գործողությունների վերսկսման մեջ, Ադրբեջանի զինված ուժերը օկուպացնում են Հայաստանի տարածքը ՝ խախտելով Հայաստանի տարածքային ինքնիշխանությունը և Եվրոպայի խորհրդի կանոնադրության համաձայն ՝ հակամարտությունները խաղաղ ճանապարհով կարգավորելու Ադրբեջանի պարտավորությունները», - գրված է համազեկուցողների տարածած հայտարարությունում։
Հիշեցնենք, որ այսօր Ռուբեն Ռուբինյանը նաև ելույթ է ունեցել ԵԽԽՎ–ում , որի ժամանակ անդրադարձել է Ադրբեջանում պահվող հայ ռազմագերիների, Հայաստանի ինքնիշխան տարածք ներխուժելու և մի շարք այլ հարցերի։
Ռուբինյանը հորդորել էր դատապարտել Ադրբեջանի նման վարքագիծը։ Նա ընդգծել էր` ադրբեջանական զորքերը պետք է անհապաղ հեռանան հայկական տարածքից, իսկ հայ ռազմագերիները պետք է ազատ արձակվեն։
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ սահմանվեց, որը պարբերաբար խախտում է ադրբեջանական կողմը։
Քննչական կոմիտեն սեպտեմբերի 30-ին հայտնեց, որ ադրբեջանական ագրեսիայի հետևանքով հայկական կողմն ունի 201 զոհ՝ 197 զինծառայող և 4 քաղաքացիական անձ, վիրավորվել է 293 զինծառայող ու 6 քաղաքացիական անձ, գերեվարվել է 20 զինծառայող:
Հոկտեմբերի 4-ին Ադրբեջանը Հայաստանին վերադարձրեց 17 գերիների։